17 сентябрь куни Миллий матбуот марказида Олий Мажлис Сенатининг маҳаллий ҳокимият вакиллик органлари фаолиятини кучайтиришга кўмаклашувчи комиссиясининг брифинги ўтказилди. Бу ҳақда Spot хабар бермоқда.
Хабарга кўра, анжуманда Комиссия раиси Толибжон Мадумаров журналистларга жорий йилнинг август сентябрь ойларида Олий Мажлис Сенати Кенгаши ҳамда Тошкент шаҳрининг барча туманлари маҳаллий Кенгашларининг қўшма мажлисларида муҳокама қилинган масалалар ва қабул қилинган қарорлар юзасидан ахборот берди.
Бугунги кунда Тошкент шаҳрида доимий аҳоли сони 2,5 миллиондан зиёд, улардан 1,5 миллион киши меҳнатга лаёқатли, 1,1 миллион нафар иш билан банд аҳоли, қарийб 99 минг ишсизлар, 90 мингдан ортиқ киши меҳнат мигрантларидир. Шунингдек, деярли 39 минг киши жорий йилда меҳнат бозорига биринчи марта кириб келган ёшлардир.
«Тошкент шаҳри бўйича фақатгина 91 минг киши Жамоат ишлари жамғармаси ҳисобидан бир марталик ва вақтинчалик ишларга жалб қилинган, бу борада мавжуд имкониятлардан тўлиқ фойдаланилмаяпти. Жорий йилнинг биринчи ярми якунларига кўра, норасмий банд аҳоли сони 141 минг нафардан зиёдни ташкил этган»,— дейилади хабарда.
Пойтахтнинг кўп қаватли уйларини куз-қиш мавсумига тайёрлаш дастури доирасида бажарилиши лозим бўлган ишларни молиялаштириш учун қарийб 158 миллиард сўм (103%) кредит маблағлари ажратилган. Бироқ, белгиланган вазифаларнинг ярмидан кўпи (51%) ўз вақтида ижро этилмаган.
Таъкидланишича, айниқса, Яшнобод, Чилонзор, Сергели, Бектемир ва Шайхонтоҳур туманларида мазкур йўналишдаги ишлар пайсалга солинаётганлиги қайд этилди. Бундан ташқари, Тошкент шаҳридаги мавжуд 1440 та хусусий уй-жой мулкдорлари ширкатидан 304 таси молиявий аҳволи қониқарсизлиги сабабли имтиёзли кредитлар ололмаган. Уларнинг аксарияти Миробод, Шайхонтоҳур, Чилонзор, Сергели ва Юнусобод туманларида жойлашган.
Хусусийлаштирилган корхоналарга кўмаклашиш ва рақобатни ривожлантириш давлат қўмитасининг ахборотига кўра, Тошкент шаҳридаги жами 505 та маҳаллада 3 мингдан зиёд фойдаланилмасдан бўш турган объект аниқланган. Жумладан, мазкур объектларнинг 335 таси давлат тасарруфидаги объект бўлса, 800 дан ортиғи илгари хусусийлаштирилган, 1300 га яқини мулкдорларнинг ўзлари томонидан қурилган ҳамда қарийб 550 таси эгасиз бино-иншоотлардир.
Изоҳ (0)