Tojikistonda aviachiptalar narxining qimmatligi hamda O‘zbekiston bilan uzoq kutilgan qo‘shnichilik aloqalarining yaxshilanishi natijasida tojikistonliklar xorijga tobora ko‘proq Dushanbedan emas, Toshkentdan uchmoqda, deb yozadi ASIA-Plus.
Aksariyat tojikistonliklar allaqachon Rossiyaga Bishkek yoki O‘sh orqali uchishga odatlanib qolgan, chunki bu Tojikiston aeroportlari orqali uchishdan sezilarli darajada arzon hisoblanadi.
Xabarda qayd etilishicha, Tojikistonning yetakchi aviakompaniyalari “Tojik Eyr” va “Somon Eyr” o‘z yo‘lovchilarini yo‘qotmoqda.
“Tojikiston va O‘zbekiston aviachiptalari orasida farq unchalik katta emas, lekin oddiy aholi uchun kichik farq ham muhim ahamiyatga ega”, — deyiladi xabarda.
Aviachiptalarni bront qilish bo‘yicha saytlar bugungi kunda Toshkent — Moskva yo‘nalishiga Dushanbedan 45 dollarga arzon parvozni taklif qilmoqda. Dubay, Pekin shaharlariga chiptalar narxida 42 dollar, Nyu-Yorkkacha to‘xtab uchishlar bilan birgalikda esa 476 dollar farq qilmoqda.
Izoh (0)