Avstraliyaning Kvinslend shtati rasmiylari qulupnaylarga tikish ignalarini sanchib ketayotganlarni topishga yordam beradigan ma’lumotni yetkazgan kishiga 100 ming Avstraliya dollari miqdorida mukofot e’lon qildi. Igna va to‘g‘nog‘ichlar oltita turli ishlab chiqaruvchining qulupnaylarida topilgan. Bu haqda TJournal xabar berdi.
Fermalardan mamlakatdagi do‘konlarga yetkazib berilayotgan mevalardagi ignalar haqidagi dastlabki xabarlar bir hafta oldin ijtimoiy tarmoqlarda paydo bo‘lgan. Brisben shahrida yashovchi Jojua Geynning aytishicha, uning do‘sti qulupnay yeyayotgan vaqtda ignani yutib yuborgan va kasalxonaga tushgan. O‘ramdagi boshqa mevalarni tekshirib ko‘rib, uning do‘stlari yana bitta igna topgan. Qulupnaylardagi ignalarga Sidney va Viktoriya shtatidagi kishilar ham duch kelgan.
Avstraliyaning yirik tarmoq supermarketlari Kvinslend shtatidan yetkazib beriladigan barcha qulupnaylarni savdodan olib tashlagan va barcha sotib olingan qulupnay o‘ramlarini qaytarib olish hamda ularning qiymatini to‘liq qaytarish haqida e’lon qilgan. Kvinslend bosh vaziri Anastasiya Palashuk 5—8-sentabr oralig‘ida sotib olingan qulupnaylarni maydalash yoki tashlab yuborish kerakligi haqida ogohlantirgan.
Kvinslend politsiyasi va qulupnay ishlab chiqaruvchilar Assotsiatsiyasi 13-sentabrdan keyin sotib olingan barcha mevalar butunlay xavfsiz ekanligini ma’lum qilgan. Rasmiylarning ta’kidlashicha, bunday hodisalar sohaga davomiy salbiy ta’sir ko‘rsatishi mumkin. Assotsiatsiyaning taxmin qilishicha, bu ishni norozi xodim qilgan bo‘lishi mumkin, biroq Kvinslend politsiyasi buning uchun dalil mavjud emasligini bildirgan.
Izoh (0)