Samarqand viloyatida 10-sentabrdan paxtani payhon qilinishini oldini olishga qaratilgan profilaktik tadbirlar o‘tkazib kelinmoqda, deya xabar bermoqda “Daryo” muxbiri Farhod Norbo‘tayev.
Profilaktik tadbirlar davomida viloyat IIB xodimlari tomonidan chorva hayvonlarining g‘o‘zani payhon qilishiga doir 28 ta, fuqarolar tomonidan ko‘sak yulish bilan bog‘liq 5 ta holat aniqlangan.
Masalan, 13-sentabrga o‘tar kechasi Kattaqo‘rg‘onning Ravot qishlog‘ida yashovchi G‘.B. “Umurzoq Barakali zamin” fermer xo‘jaligi dalasidan paxta ko‘saklarini yulib, olib ketayotgan vaqtida huquqni muhofaza qiluvchi organlar xodimlari tomonidan ushlangan.
11-sentabr kuni erta tongda Paxtachi tumanining Istiqbol qishlog‘ida yashovchi S.Sh. shu qishloqda joylashgan “Oydin” fermer xo‘jaligiga tegishli 10 gektarlik paxta maydonidan 18 kilogramm paxta ko‘sagini terib, olib ketayotgan vaqtida ushlangan.
Shu tumanning boshqa — Saroy qishlog‘ida yashovchi ikki fuqaro esa qishloqqa yondosh “Abdu-ota” fermer xo‘jaligining paxta maydonidan jami 26 kilogramm paxta ko‘sagini terib, olib ketayotgan vaqtida qo‘lga olingan.
Samarqand viloyat IIB matbuot xizmati boshlig‘i Shirin Normatovaning ma’lum qilishicha, Paxtachi tumanida bo‘lib o‘tgan sayyor sud majlisida ushbu fuqarolarga nisbatan Ma’muriy javobgarlik to‘g‘risidagi kodeksning tegishli moddalari bilan ma’muriy javobgarlik belgilangan.
Bundan tashqari, ularning zimmasiga fermer xo‘jaliklariga yetkazilgan zararni qoplab berish mas’uliyati ham yuklatilgan.
Izoh (0)