Samarqand viloyatidan kelgan va tarkibidan tadbirkorlar hamda madaniyat arboblari joy olgan delegatsiya So‘g‘d viloyatida izzat-ikrom bilan kutib olindi. Bu haqda “Xalq so‘zi” xabar berdi.
Mehmonlar tashrifi munosabati bilan folklor-etnografiya jamoalari tomonidan konsert dasturi namoyish etib berildi. Mashhur qo‘shiqchilar sho‘x ashulalarni ijro etdi, mehmonlar va mezbonlar birgalikda raqsga tushdi.
— Biz samarqandliklar bilan yangi uchrashuvni sabrsizlik bilan kutdik va o‘zbekistonliklarni bizning ko‘hna zaminimizda ko‘rib turganimizdan chin dildan xursandmiz, — dedi So‘g‘d viloyati raisi o‘rinbosari Nazira G‘afori. — Birgina shu yilning o‘zida Samarqand viloyatilik do‘stlarimiz bilan ko‘plab unutilmas va iliq diydor ko‘rishishlar bo‘lib o‘tdi. Masalan, birgalikda Navro‘z bayramini nishonladik. Mana, hududimiz aholisini chin yurakdan quvontirgan yana bir uchrashuvga guvoh bo‘lib turibmiz.
7—9-sentabr kunlari Xo‘jandda tashkil etilgan Samarqand kunlari doirasida So‘g‘d va Samarqand viloyati ishbilarmonlari ishtirokida biznes-forum, samarqandlik ishbilarmonlar va hunarmandlar tomonidan tayyorlangan mahsulotlar ko‘rgazmasi ham o‘tkazildi. Mehmonlarning Tojikiston Respublikasi mustaqillik kuni munosabati bilan tashkil etiladigan tantanali tadbirlarda qatnashishi va Samarqand viloyati san’at ustalari tomonidan katta konsert dasturi berilishi bugungi kun dasturining eng asosiy voqealaridan biriga aylandi.
Ma’lumot uchun, o‘zaro hamkorlikni rivojlantirish maqsadida joriy yil aprel oyida Samarqandda So‘g‘d va Samarqand viloyati ishbilarmonlarining biznes-forumi bo‘lib o‘tgan, tadbir davomida ijtimoiy-iqtisodiy sohalarda ikki tomonlama hamkorlikni yanada chuqurlashtirish hamda kengaytirishga qaratilgan qator bitimlar imzolangandi.
Izoh (0)