Самарқанд вилоятидан келган ва таркибидан тадбиркорлар ҳамда маданият арбоблари жой олган делегация Сўғд вилоятида иззат-икром билан кутиб олинди. Бу ҳақда «Халқ сўзи» хабар берди.
Меҳмонлар ташрифи муносабати билан фолклор-этнография жамоалари томонидан концерт дастури намойиш этиб берилди. Машҳур қўшиқчилар шўх ашулаларни ижро этди, меҳмонлар ва мезбонлар биргаликда рақсга тушди.
— Биз самарқандликлар билан янги учрашувни сабрсизлик билан кутдик ва ўзбекистонликларни бизнинг кўҳна заминимизда кўриб турганимиздан чин дилдан хурсандмиз, — деди Сўғд вилояти раиси ўринбосари Назира Ғафори. — Биргина шу йилнинг ўзида Самарқанд вилоятилик дўстларимиз билан кўплаб унутилмас ва илиқ дийдор кўришишлар бўлиб ўтди. Масалан, биргаликда Наврўз байрамини нишонладик. Мана, ҳудудимиз аҳолисини чин юракдан қувонтирган яна бир учрашувга гувоҳ бўлиб турибмиз.
7—9 сентябрь кунлари Хўжандда ташкил этилган Самарқанд кунлари доирасида Сўғд ва Самарқанд вилояти ишбилармонлари иштирокида бизнес-форум, самарқандлик ишбилармонлар ва ҳунармандлар томонидан тайёрланган маҳсулотлар кўргазмаси ҳам ўтказилди. Меҳмонларнинг Тожикистон Республикаси мустақиллик куни муносабати билан ташкил этиладиган тантанали тадбирларда қатнашиши ва Самарқанд вилояти санъат усталари томонидан катта концерт дастури берилиши бугунги кун дастурининг энг асосий воқеаларидан бирига айланди.
Маълумот учун, ўзаро ҳамкорликни ривожлантириш мақсадида жорий йил апрель ойида Самарқандда Сўғд ва Самарқанд вилояти ишбилармонларининг бизнес-форуми бўлиб ўтган, тадбир давомида ижтимоий-иқтисодий соҳаларда икки томонлама ҳамкорликни янада чуқурлаштириш ҳамда кенгайтиришга қаратилган қатор битимлар имзоланганди.
Изоҳ (0)