O‘zbekiston Prezidenti Shavkat Mirziyoyev 29-avgust kuni milliarder Alisher Usmonovni “El-yurt hurmati” ordeni bilan mukofotlash haqida farmon imzolagan edi. 31-avgust kuni Alisher Usmonov ushbu ordenni Prezidentning shaxsan o‘zidan qabul qilib oldi. Shundan so‘ng u kichik bir nutq bilan chiqish qildi.
Bugungi kun hayotimdagi juda ulug‘ va hayajonli bir kun bo‘lib qoladi. Chunki Vatan rahbari bugun meni mana shunday yuksak nishon bilan taqdirladi. Shundan keyin qaysi so‘z bilan o‘z minnatdorchiligingni bildirishing mumkin — men bunday so‘zni topishga ojizman.Chunki bugun mening hayotimdagi shuncha qiyinchiliklar, armonlar, umidlar yuzaga chiqyapti. Va faqat mening hayotimdagi emas, balki butun o‘zbek xalqining umidlari bugun sizning qo‘lingizga topshirilgan. Albatta, har bir o‘zbek o‘g‘lining bugungi majburiyati — qo‘lidan kelgancha, balki qo‘lidan kelishidan ham ko‘proq yoningizda bo‘lishi kerak.
Albatta, bu yo‘l juda ham qiyin va bugun bu borada hech kim bizga yengillik bermaydi. Ishonchim komilki, butun xalq shunday rahbar boshchiligida albatta o‘ylagan rejalariga yetadi. Men o‘zim uchun, mana shu rejalarga yetishish uchun qilingan har bir harakatimni hayotimning mazmuni deb bilaman.
Sizga yana bir bor katta minnatdorchilik, o‘zingizga sihat-salomatlik, kuch-quvvat, xalqimizga tinchlik, farovon hayot va, albatta, iqtisodiy boylik tilayman.
Alisher Usmonov
Izoh (0)