Ўзбекистон бош вазири Абдулла Арипов «Францияга олий даражадаги ташриф давомидаги маданий-гуманитар тадбирларга тайёргарлик кўриш ва уларни ўтказиш чора-тадбирлари тўғрисида»ги қарорни имзолади. Қарор «Lex.uz»да эълон қилинди.
Қарорда маълум қилинишича, Ўзбекистон Президенти Шавкат Мирзиёев 2018 йилнинг октябрь ойида олий даражадаги ташриф билан Францияга боради. Ҳукуматнинг ушбу қарори билан ушбу ташрифнинг маданий-гуманитар қисмига тайёргарлик кўриш бўйича «йўл харитаси» тасдиқланган.
Ташрифнинг ушбу қисмига тайёргарлик доирасида Маданият вазирлигига, истисно тариқасида, тендер (танлов) савдолари ўтказмасдан, энг яхши таклифларни танлаб олиш йўли билан товарларни етказиб берувчилар, ишларни бажарувчилар ва хизматларни кўрсатувчилар билан тўғридан-тўғри шартномалар тузишга рухсат берилди.
Шунингдек, Маданият вазирлиги ҳузурида Франция маданият маркази ташкил этилади. Қарорда қайд этилишича, ушбу марказни ташкил этиш таклифи Маданият вазирлиги, Туризмни ривожлантириш давлат қўмитаси, Молия вазирлиги, Давлат рақобат қўмитаси ва «Сен ёлғиз эмассан» республика ижтимоий болалар жамғармаси томонидан берилган.
Изоҳ (0)