Qurolli Kuchlar Akademiyasida Mudofaa vazirligi tizimida o‘tkazib kelingan “Eng yaxshi yosh kitobxon” tanlovining yakuniy bosqichi bo‘lib o‘tdi. Bu haqda “Daryo”ga vazirlik matbuot xizmati ma’lum qildi.
Musobaqa ishtirokchilarini Mudofaa vazirligi jamoatchilik kengashi raisi, O‘zbekiston xalq shoiri Iqbol Mirzo, O‘zbekiston fanlar akademiyasi Markaziy kutubxonasi direktori Zuhra Berdiyeva, Mudofaa vazirligi Ma’naviyat va ma’rifat markazi bosh mutaxassisi Ubaydullo Oltinov, iste’dodli shoir Azizbek Anvar, Yozuvchilar uyushmasi a’zosi Farog‘at Xudoyqulova, “Tamaddun nuri” jurnali bosh muharriri Munavvara Qurbonboyeva baholab bordi.
Uch bosqichdan iborat sinovlarning birinchi va ikkinchi shartlari o‘zbek va jahon adabiyoti asarlari tahliliga bag‘ishlangan bo‘lsa, uchinchi shartda ishtirokchilar she’riyat yo‘nalishida o‘z iqtidorlarini sinovdan o‘tkazdi.
Adabiy musobaqaning yakuniy natijalariga ko‘ra, Toshkent harbiy okrugi nomidan ishtirok etgan oddiy askar Bog‘ibek Ashirov barcha shartlarda faollik ko‘rsatib, birinchi o‘rinni qo‘lga kiritdi va noutbuk bilan taqdirlandi.
Sharqiy harbiy okrug nomidan ishtirok etgan oddiy askar Abdulbosit Anvardinov ikkinchi o‘rinni qo‘lga kiritib, planshet sohibi bo‘lgan bo‘lsa, Markaziy harbiy okrug nomidan oddiy askar Sherzod Beg‘amov uchinchi o‘rinni egallab, uyali telefon apparati bilan mukofotlandi.
Izoh (0)