Қуролли Кучлар Академиясида Мудофаа вазирлиги тизимида ўтказиб келинган «Энг яхши ёш китобхон» танловининг якуний босқичи бўлиб ўтди. Бу ҳақда «Дарё»га вазирлик матбуот хизмати маълум қилди.
Мусобақа иштирокчиларини Мудофаа вазирлиги жамоатчилик кенгаши раиси, Ўзбекистон халқ шоири Иқбол Мирзо, Ўзбекистон фанлар академияси Марказий кутубхонаси директори Зуҳра Бердиева, Мудофаа вазирлиги Маънавият ва маърифат маркази бош мутахассиси Убайдулло Олтинов, истеъдодли шоир Азизбек Анвар, Ёзувчилар уюшмаси аъзоси Фароғат Худойқулова, «Тамаддун нури» журнали бош муҳаррири Мунаввара Қурбонбоева баҳолаб борди.
Уч босқичдан иборат синовларнинг биринчи ва иккинчи шартлари ўзбек ва жаҳон адабиёти асарлари таҳлилига бағишланган бўлса, учинчи шартда иштирокчилар шеърият йўналишида ўз иқтидорларини синовдан ўтказди.
Адабий мусобақанинг якуний натижаларига кўра, Тошкент ҳарбий округи номидан иштирок этган оддий аскар Боғибек Аширов барча шартларда фаоллик кўрсатиб, биринчи ўринни қўлга киритди ва ноутбук билан тақдирланди.
Шарқий ҳарбий округ номидан иштирок этган оддий аскар Абдулбосит Анвардинов иккинчи ўринни қўлга киритиб, планшет соҳиби бўлган бўлса, Марказий ҳарбий округ номидан оддий аскар Шерзод Беғамов учинчи ўринни эгаллаб, уяли телефон аппарати билан мукофотланди.
Изоҳ (0)