Avstriyadagi tog‘ koni rahbariyati ochiq sayoz kon hududi bo‘ylab sayrlardan foydalanishni taklif qilyapti. Sayr davomida tashrifchilarni jahondagi eng ulkan taksi — 55 tonnali Haulpak 85 kon samosvali olib yuradi, deb yozadi “Motor”.
Kattalar uchun eng arzon chipta narxi 17 yevroni tashkil etadi. “Taksi” kon mehmonlariga xizmat ko‘rsatayotgani aks etgan video YouTube’dagi GooDMooD kanalida e’lon qilingan.
Tashrifchilar samosvalda konning ilonizi yo‘llaridan olib yuriladi, shuningdek, ular rudani qazib olish jarayonini bevosita kuzatish imkoniga ega bo‘ladi. Bundan tashqari, qo‘shimcha haq evaziga kondagi portlash ishlarini ham tomosha qilish mumkin.
Ma’lumot uchun, Haulpak 85 samosvalining uzunligi 11,5 metrni, eni 5,5 metrni, balandligi esa 4,5 metrni tashkil etadi. Mashinaga 860 ot kuchiga ega V12 dvigatel o‘rnatilgan bo‘lib, u soatiga 50—55 litr yoqilg‘i “iste’mol qiladi”. Samosval soatiga 60 kilometrgacha tezlikda harakatlanishi, 77 tonnagacha ruda tashishi mumkin.
Izoh (0)