Ferrari kompaniyasi debyuti sentabr o‘rtalarida maxsus tadbirda bo‘lib o‘tadigan yangi superkarning ilk suratini namoyish etdi. Mish-mishlarga ko‘ra, zavoddagi ichki raqami F176 bo‘lgan spidster 812 Superfast modeli bazasida tayyorlanadi va rasman 812 Monza nomini oladi. Bu haqda “Motor” xabar bermoqda.
Uslub jihatidan Ferrari 812 Monza modeli 2000-yilda taqdim etilgan Ferrari Rossa konsept-karini takrorlaydi. Mashina dizayni afsonaviy 250 Testa Rossa’dan ilhom olingani holda Pininfarina atelyesi tomonidan tayyorlangan. Avtomobil old oynaning pastligi va xavfsizlik yoylari (dugalari)ning relyefli ekani bilan ajralib turadi.
Mashina motori haqida hozircha ma’lumot yo‘q. Ma’lumot uchun, oddiy 812 Superfast’ga hajmi 6,5 litrli V12 atmosfera-dvigatel o‘rnatiladi; uning quvvati 800 ot kuchiga teng. U ikki ulanish (ssepleniya)li yetti bosqichli robot uzatmalar qutisi bilan hamohanglikda superkarni atigi 2,9 soniyada soatiga 100 kilometrlik tezlikka olib chiqa oladi. Avtomobilning eng yuqori tezligi soatiga 340 kilometr bilan cheklab qo‘yilgan.
Izoh (0)