Азим Аҳмедхўжаев Ўзбекистон ахборот технологиялари ва коммуникацияларни ривожлантириш вазири лавозимидан озод этилди. Бу ҳақда, ҳукуматдаги манбаларга асосланиб, «Газета.uz» хабар бермоқда.
Унинг ўрнига Шуҳрат Муҳаммаджонович Содиқов вазирлик раҳбари этиб тайинланган. Шуҳрат Содиқов бунгача Ўзбекистон Президенти ҳузуридаги Лойиҳа бошқаруви миллий агентлиги (ЛБМА)га директорлик қилган.
Азим Аҳмедхўжаев энди Президент фармони билан ЛБМАда ташкил этилган янги — Иқтисодиёт ва блокчейнни ривожлантириш бўйича блокни бошқаради.
Шуҳрат Содиқов (1969 йилда туғилган) 2010 йилдан Вазирлар Маҳкамасида Ахборот тизимлари ва телекоммуникациялар масалалари бўйича ахборот-таҳлил департаменти мудири бўлиб ишлаган. Аввалроқ, 2008—2010 йилларда «Ўзбектелеком» компанияси бош директори, 2006—2008 йилларда шу компания бош директори ўринбосари сифатида фаолият кўрсатган.
Азим Аҳмедхўжаев (1979 йилда туғилган) — Тошкент давлат ахборот технологиялари университети битирувчиси (2002 йил). 2017—2018 йилларда Инвестициялар бўйича давлат қўмитасига раҳбарлик қилган. 2016 йил майидан 2017 йил мартига қадар «Асака-банк» бошқаруви раиси, бунгача — 2011 йил майидан Миллий банк бошқаруви раиси ўринбосари, раиснинг биринчи ўринбосари лавозимларида ишлаган. Бундан аввал — 2009 йил январидан Миллий банкнинг NBU Инвест Group шуъбасига раислик қилган. Бунгача Иқтисодиёт вазирлиги ҳамда Ўзбекистон тикланиш ва тараққиёт жамғармаси тузилмаларида ишлаган.
Изоҳ (0)