Ёшлар иттифоқи Наманган вилоят кенгашининг навбатдан ташқари йиғилиши бўлиб ўтди. Бу ҳақда «Дарё» мухбири хабар бермоқда.
Мазкур йиғилишда вилоят кенгашининг ўтган бир йилдан зиёд вақт давомидаги фаолияти сарҳисоб қилиниб, танқидий-таҳлилий кўриб чиқилди.
Ўзбекистон ёшлар иттифоқи марказий кенгаши раисининг ўринбосари Ўткир Шукуров сўзга чиқиб, Наманган вилоятида ёшлар билан ишлаш бугунги кун талабига тўлақонли жавоб бера олмаётгани, иттифоқ ходимларининг аксарияти ўзининг функсионал вазифаларини англай олмаётганини қайд этди. Ташкилотнинг Учқўрғон, Чуст ва Норин туманлари кенгашлари фаолияти хусусида эътирозлар бўлди.
«Yoshlar – kelajagimiz» Давлат дастурини кенг тарғиб этиш ҳамда унинг ижросини таъминлаш масаласига жиддий эътибор қаратиш лозимлиги таъкидланди.
Ёшлар иттифоқи давлат томонидан белгиланган имтиёз ва қулайликларни қўллашда қариндош-уруғчилик, таниш-билишчилик, коррупция каби салбий ҳолатларга йўл қўймаслиги ҳам муҳим вазифа эканлиги айтиб ўтилди.
Йиғилишда ташкилий масала кўрилди. Ўзбекистон ёшлар иттифоқи марказий кенгаши таъсисчилигидаги «Ёшлар агрокластери» директори Абдулазиз Мўминов Ўзбекистон ёшлар иттифоқи Наманган вилояти кенгаши раиси вазифасини бажарувчи этиб тайинланди. Ўтган бир йил мобайнида вилоят ёшлар ташкилотини бошқариб келган Илёсбек Раҳимов эса «Yoshlar – kelajagimiz» республика жамғармаси ижрочи директорининг биринчи ўринбосари лавозимида иш бошлайдиган бўлди.
Маълумот ўрнида, Абдулазиз Мўминов 1990 йилда Наманган шаҳрида туғилган. Наманган муҳандислик-педагогика институти ва Тошкент давлат архитектура ва қурилиш институтини тамомлаган. Талабалик йилларида Беруний номидаги давлат стипендияси совриндори бўлган. Меҳнат фаолиятини «Камолот» ёшлар ижтимоий ҳаракати Наманган вилоят кенгашида бошлаган ва турли вазифаларда самарали иш олиб борган.
Изоҳ (0)