O‘zbekiston Ichki ishlar vazirligi Yo‘l harakati xavfsizligi bosh boshqarmasining xabariga ko‘ra o‘tgan haftada — 30-iyuldan 5-avgustgacha mamlakat avtomobil yo‘llarida jami 160 ta yo‘l-transport hodisasi sodir etildi. Bu haqda IIV Jamoatchilik va ommaviy axborot vositalari bilan aloqalar boshqarmasi ma’lum qildi.
Ushbu YTHlarda 44 nafar fuqaro halok bo‘lib, 142 nafar fuqaro turli darajadagi tan jarohatlari olgan. Hafta davomida yo‘l-patrul xizmati inspektorlari tomonidan jami 86 171 ta qoidabuzarlik aniqlangan. Bu qoidabuzarliklarning 40 362 tasini qo‘pol qoidabuzarliklar tashkil etadi.
Jumladan, 1 596 nafar haydovchi transport vositasini mast holda boshqarganligi, 11 916 nafar haydovchi belgilangan tezlik talablarini buzganligi, 1 168 nafar haydovchi svetoforning taqiqlovchi ishorasiga rioya etmasdan chorrahalardan o‘tish qoidasini buzganligi, 11 827 nafar haydovchi odam tashish qoidasini buzganligi, 254 nafar haydovchi temir yo‘l kesishmalaridan o‘tish qoidasini buzganligi uchun to‘xtatilgan va ularga nisbatan ma’muriy bayonnomalar rasmiylashtirilgan.
“Shuningdek, transport vositasi oynalarini me’yoridan ortiqcha qoraytirgan 679 nafar, harakat vaqtida telefondan foydalangan 908 nafar va xavfsizlik kamarlarini taqmasdan harakatlangan 15 416 nafar haydovchiga nisbatan ham tegishli choralar ko‘rildi”, — deyiladi vazirlik axborotida.
Izoh (0)