Toshkentdagi Xalqaro savdo markazida 23-iyul kuni Savdo-iqtisodiy va ilmiy-texnikaviy hamkorlik bo‘yicha O‘zbekiston — Vyetnam hukumatlararo komissiyasining navbatdagi majlisi bo‘lib o‘tdi. Bu haqda O‘zA xabar berdi.
Tadbirda ikki mamlakatning tashqi iqtisodiy aloqalar, savdo-sanoat, sarmoya, fan-ta’lim, qishloq va suv xo‘jaligi kabi qator sohalar uchun mas’ul vazirlik va idoralari, kompaniya va konsernlari rahbarlari ishtirok etdi.
Tashqi savdo vaziri, komissiya hamraisi Jamshid Xo‘jayev, Vyetnam sanoat va savdo vazirining o‘rinbosari Xoang Kuok Viong va boshqalar mamlakatlar o‘rtasidagi hamkorlik barcha yo‘nalishlarda, jumladan, savdo-iqtisodiy, sanoat va ilmiy-texnikaviy sohalarda izchil rivojlanib borayotganini alohida ta’kidladi.
Mamlakatlar savdo-iqtisodiy aloqalarni rivojlantirish borasida ulkan salohiyatga ega. O‘zbekiston Vyetnamga loviya, ipak, yuqori sifatli paxta tolasi, mineral o‘g‘itlar va boshqa tovarlar eksport qiladi. Vyetnam O‘zbekistonga uskunalar, elektrotexnika, farmatsevtika mahsulotlari, qahva va choy yetkazib beradi.
O‘zaro tovar ayirboshlash hajmi muntazam oshmoqda. Bu boradagi ko‘rsatkich joriy yilning o‘tgan olti oyida 2017-yilning shu davriga nisbatan 2,5 baravar ortdi va 30 million dollarga yetdi. Tomonlar bu ko‘rsatkichni yil oxiriga qadar 100 million dollarga yetkazish uchun barcha imkoniyatlar mavjudligini bildirdi.
Hukumatlararo komissiya majlisida O‘zbekiston va Vyetnam o‘zaro tovar ayirboshlash hajmini yanada oshirishdan, keng ko‘lamli savdo-iqtisodiy, sarmoyaviy va ilmiy-texnikaviy hamkorlikni kengaytirishdan manfaatdor ekani ta’kidlandi. Mamlakatlar qishloq xo‘jaligi, fan-texnika, sayyohlik, xususiy tadbirkorlik kabi sohalarda hamkorlikni rivojlantirish borasida katta salohiyatga ega ekani qayd etildi.
Vyetnam delegatsiyasi O‘zbekistonda olib borilayotgan iqtisodiy siyosat, xorijiy investitsiya jalb qilish uchun yaratilayotgan sharoit, erkin va kichik sanoat zonalaridagi imkoniyatlar bilan tanishtirildi.
Tadbirda o‘zaro hamkorlikda qo‘shma loyihalarni ishlab chiqish va amalga oshirish masalalariga alohida e’tibor qaratildi. O‘zbekistondagi qulay investitsiyaviy muhit tufayli Vyetnam ishbilarmonlarining yurtimizda tadbirkorlik faoliyatini yo‘lga qo‘yishga qiziqishi ortib borayotgani qayd etildi. Savdo, iqtisodiyot, sarmoya, xususiy sektor kabi yo‘nalishlardagi hamkorlikni yanada faollashtirish, ekologik toza texnologiyalarni joriy etish va rivojlantirishga doir masalalar muhokama qilindi.
Shu kuni Vyetnam delegatsiyasi a’zolari qator vazirlik va idoralarda iqtisodiy va sarmoyaviy hamkorlikni kengaytirish masalalari yuzasidan uchrashuv va muzokaralar o‘tkazdi.
Izoh (0)