Buxoro viloyatida qishloq xo‘jaligi mahsulotlari ishlab chiqarishni kengaytirish va qayta ishlashni chuqurlashtirish, ularning eksport hajmini oshirish yanada takomillashadi, deb yozmoqda O‘zA.
O‘zbekiston Prezidentining 2018-yil 10-iyuldagi “‘Buxoro-agro’ erkin iqtisodiy zonasini tashkil etish chora-tadbirlari to‘g‘risida”gi qarori asosida tashkil etiladigan “Buxoro-agro” erkin iqtisodiy zonasi tashqi bozorda talab katta bo‘lgan, yuqori qo‘shilgan qiymatli raqobatbardosh mahsulotlar yetishtirishni ta’minlaydigan zamonaviy issiqxona xo‘jaliklarini tashkil etishni ko‘zda tutadi.
Viloyatda pomidor, bodring va boshqa qishloq xo‘jaligi mahsulotlari yetishtiriladigan issiqxonalar yildan-yil ko‘paymoqda. Ammo “Buxoro-agro” EIZ zimmasiga yuklatilgan vazifalar va faoliyat yo‘nalishlariga mos holda, hududda qishloq xo‘jaligi mahsulotlarini ishlab chiqarishni kengaytirish, qayta ishlashni chuqurlashtirish va ularning eksport hajmini oshirishga erishish nuqtai nazaridan olib qaralganda, ular hududi, klaster usuli asosida tashkil etiladigan yangi issiqxona xo‘jaliklari bilan raqobatlasha olmaydi.
Erkin iqtisodiy zona zamonaviy issiqxona xo‘jaliklarini, jumladan, gidroponika texnologiyalarini qo‘llagan holda to‘g‘ridan-to‘g‘ri xorijiy va mahalliy investitsiyalar jalb etish, qishloq xo‘jalik mahsulotlari ishlab chiqarishning urug‘dan tortib mahsulotni bozorga yetkazib berishgacha bo‘lgan barcha jarayonini yo‘lga qo‘yish hamda rag‘batlantirishning samarali mexanizmlarini joriy qilishi bilan dunyoning eng rivojlangan mamlakatlaridagi ilg‘or tajribani o‘zida ifoda etadi.
“Buxoro-agro” EIZ logistika xizmatlari ko‘rsatishning zamonaviy infratuzilmasini shakllantirish, qishloq xo‘jaligi ishlab chiqarish subyektlariga ular tomonidan yetishtirilgan mahsulot eksportini tashkil qilishda ko‘maklashish, issiqxonalar faoliyatini yo‘lga qo‘yishda zamonaviy resurs tejovchi texnologiyalarni, muqobil issiqlik energiyalaridan foydalanishni keng joriy etish bilan shug‘ullanadi. U ishlab chiqarilayotgan mahsulotlarni standartlashtirish, sertifikatlashtirish va markirovka qilish bo‘yicha xalqaro standartlarga muvofiq ilmiy-ishlab chiqarish markazlari tashkil etish va ularning xulosalari xalqaro darajada e’tirof etilishini ta’minlash choralarini ko‘radi. Issiqxona xo‘jaliklari sohasida yuqori malakali mutaxassislar tayyorlashda bo‘lajak kadrlarning “Buxoro-agro” EIZ hududida faoliyat yuritayotgan korxonalarda ishlab chiqarish amaliyotini o‘tashiga yordam ko‘rsatadi.
Yana bir jihat, zamonaviy issiqxonalar qurish uchun ko‘plab konstruksiya va jihozlar zarur bo‘ladi. Ularni chetdan keltirish esa ancha xarajat talab qiladi, bu, o‘z navbatida, mahsulot tannarxiga salbiy ta’sir ko‘rsatadi. Shuning uchun viloyat hokimligi manfaatdor idoralar bilan birgalikda ilg‘or texnologiyalarni qo‘llagan holda bunday konstruksiya va jihozlar ishlab chiqarishga ixtisoslashtirilgan mahalliy korxonalarni tashkil etadi. Bu esa, yangi ish o‘rinlari deganidir.
Viloyat erkin iqtisodiy zonalar va kichik sanoat zonalari ma’muriy kengashi tomonidan Prezident qarorida belgilangan muddatda “Buxoro-agro” EIZ direksiyasi va uning faoliyatini tashkil etish chora-tadbirlari ko‘rilmoqda. Ayni paytda mazkur kengash tegishli vazirlik va idoralar bilan birgalikda EIZ hududida loyihalar amalga oshirish uchun tadbirkorlik subyektlari jalb etilishini, ular bilan tizimli ishlar olib borilishini, shuningdek, loyihalarni mazkur hududga joylashtirish uchun investitsiya loyihalarining sifatli va o‘z vaqtida ko‘rib chiqilishi, ishbilarmonlarga biznes-rejalar ishlab chiqishda ko‘maklashadi.
Qarorga muvofiq, “Buxoro-agro” EIZ direksiyasi erkin iqtisodiy zonaning butun faoliyati davrida asosiy faoliyat turi bo‘yicha soliqlar va davlat maqsadli jamg‘armalariga majburiy ajratmalar to‘lashdan ozod etilishi ishni tashkil qilish va yo‘lga qo‘yishda qulaylik yaratadi. EIZ hududida amalga oshiriladigan loyihalarni moliyalashtirish uchun xorijiy investitsiyalar, donor mamlakatlar, xalqaro moliya institutlarining kredit va grantlari jalb etiladi. Bunda xorijiy va mahalliy investorlarni izlash va jalb qilish, ular faoliyatini tashkil etishga ko‘maklashiladi.
Qarorga muvofiq, viloyat hokimligining “Yagona buyurtmachi xizmati” injiniring kompaniyasi “Buxoro-agro” EIZning bosh rejasini ishlab chiqish, shuningdek, yo‘l-transport, muhandislik-kommunikatsiya infratuzilmasini qurish hamda rekonstruksiya qilish bo‘yicha buyurtmachi, “Qishloq qurilish loyiha” MChJ esa EIZning bosh rejasini ishlab chiqish bo‘yicha bosh loyihalash tashkiloti etib belgilandi.
Ayni paytda ”Buxoro-agro” EIZ ga kiruvchi hududlar ro‘yxati shakllantirildi. Unga ko‘ra, Buxoro tumanida 500 gektar, Jondor tumanida 100 gektar, Kogon tumanida 900 gektar, Peshku tumanida 400 gektar, Romitan tumanida 1100 gektar, jami 3000 gektar yer ajratiladi. Ta’kidlash kerakki, hududlarni tanlashda ularda infratuzilma barpo etish qulayliklari, avtomobil yoki temir yo‘llari bilan chegaradoshligi inobatga olindi.
Izoh (0)