Fransiya poytaxti Parij shahrida mehmonxonlardagi sayyohlarni o‘marib ketayotgan “mehmonxona kalamushlari” deb nomlangan jinoiy guruh faoliyat olib bormoqda. Bu haqda “RIA Novosti” xabar berdi.
Ularning qanday ishlashi haqida politsiya komissari Toni Marye hikoya qilib bergan. Uning so‘zlariga ko‘ra, ba’zi firibgarlar sayyohlar guruhlariga aralashib, mehmonxonalarga kiradi. Mehmonlar ro‘yxatdan o‘tish bilan band bo‘lgan vaqtda jinoyatchilar ularning sumkalari va jamadonlarini o‘g‘irlab ketadi.
Shuningdek, o‘g‘rilar mehmonxonaga kirish uchun boshqalarning nomidan ham foydalanadi, keyin esa xonalarga kirib, qimmatbaho buyumlarni izlaydi, seyflarni ochadi. O‘g‘rilar magnit qulfli eshiklarni ochgan va jazosiz g‘oyib bo‘lgan holatlar ham qayd etilgan. Ular faqat Parijda emas, balki boshqa sayyohlik shaharlarida ham ishlaydi.
Iyun oyida Parijda yana besh mingta politsiyachi ish boshlagani ma’lum bo‘ldi. Ularning vazifasi sayyohlarni firibgar va o‘g‘rilardan himoya qilish hisoblanadi. Xavfsizlik choralarining kuchaytirilgan rejimi sayyohlik mavsumi hisoblangan 11-iyundan 30-sentabrga qadar davom etadi.
Izoh (0)