Франция пойтахти Париж шаҳрида меҳмонхонлардаги сайёҳларни ўмариб кетаётган «меҳмонхона каламушлари» деб номланган жиноий гуруҳ фаолият олиб бормоқда. Бу ҳақда «РИА Новости» хабар берди.
Уларнинг қандай ишлаши ҳақида полиция комиссари Тони Марье ҳикоя қилиб берган. Унинг сўзларига кўра, баъзи фирибгарлар сайёҳлар гуруҳларига аралашиб, меҳмонхоналарга киради. Меҳмонлар рўйхатдан ўтиш билан банд бўлган вақтда жиноятчилар уларнинг сумкалари ва жамадонларини ўғирлаб кетади.
Шунингдек, ўғрилар меҳмонхонага кириш учун бошқаларнинг номидан ҳам фойдаланади, кейин эса хоналарга кириб, қимматбаҳо буюмларни излайди, сейфларни очади. Ўғрилар магнит қулфли эшикларни очган ва жазосиз ғойиб бўлган ҳолатлар ҳам қайд этилган. Улар фақат Парижда эмас, балки бошқа сайёҳлик шаҳарларида ҳам ишлайди.
Июнь ойида Парижда яна беш мингта полициячи иш бошлагани маълум бўлди. Уларнинг вазифаси сайёҳларни фирибгар ва ўғрилардан ҳимоя қилиш ҳисобланади. Хавфсизлик чораларининг кучайтирилган режими сайёҳлик мавсуми ҳисобланган 11 июндан 30 сентябрга қадар давом этади.
Изоҳ (0)