Gruziya prezidentligiga nomzodini qo‘yishga hozirlanayotgan Yangi siyosiy markaz muxolifat partiyasi yetakchisi Girchi Zurab Japaridze Tbilisi hayvonot bog‘i ma’muriyatiga sudga borishi uchun bir necha soatga urg‘ochi tuyaqushni berib turishni so‘rab murojaat qilgan. Biroq bog‘ ma’muriyati buni rad etgan, deb yozmoqda “Korrespondent.net”.
Japaridzening yozma murojaatida qayd etilishicha, u 13-iyul kuni Tbilisi shahar sudiga borish uchun tuyaqushni olishni xohlaydi. Sudda 12-may kuni uning namoyish chog‘ida tartibni buzgani va politsiya talabiga bo‘ysunmagani uchun qo‘lga olingani bilan bog‘liq ish ko‘rib chiqiladi.
Muxolifatchining ma’lum qilishicha, tuyaqush bugungi kunda Gruziya sudi qanday holatda ekanini aks ettiradi, xususan, “boshi qumda va reallikni ko‘rmaydi”.
Japaridze tuyaqushni sudga olib borish bo‘yicha transportni ta’minlashga va bu vaqtda qush bilan hech narsa yuz bermasligini o‘z bo‘yniga olishga va’da bergan.
O‘z navbatida, Tbilisi hayvonot bog‘i direktori muassasada tuyaqush yo‘qligini, siyosatchi ertalab suratga olgan qush esa emu ekanligini ma’lum qilgan.
Bog‘ rahbarining so‘zlariga ko‘ra, hayvon yoki qushlarni bir necha soatga ijaraga berish har qanday holatda ham mumkin emas. Ularni ko‘chirib o‘tkazish katta stress bilan bog‘langan, hayvonot bog‘ining vazifasi esa hayvonlarga g‘amxo‘rlik qilish sanaladi.
Izoh (0)