Грузия президентлигига номзодини қўйишга ҳозирланаётган Янги сиёсий марказ мухолифат партияси етакчиси Гирчи Зураб Жапаридзе Тбилиси ҳайвонот боғи маъмуриятига судга бориши учун бир неча соатга урғочи туяқушни бериб туришни сўраб мурожаат қилган. Бироқ боғ маъмурияти буни рад этган, деб ёзмоқда «Корреспондент.net».
Жапаридзенинг ёзма мурожаатида қайд этилишича, у 13 июль куни Тбилиси шаҳар судига бориш учун туяқушни олишни хоҳлайди. Судда 12 май куни унинг намойиш чоғида тартибни бузгани ва полиция талабига бўйсунмагани учун қўлга олингани билан боғлиқ иш кўриб чиқилади.
Мухолифатчининг маълум қилишича, туяқуш бугунги кунда Грузия суди қандай ҳолатда эканини акс эттиради, хусусан, «боши қумда ва реалликни кўрмайди».
Жапаридзе туяқушни судга олиб бориш бўйича транспортни таъминлашга ва бу вақтда қуш билан ҳеч нарса юз бермаслигини ўз бўйнига олишга ваъда берган.
Ўз навбатида, Тбилиси ҳайвонот боғи директори муассасада туяқуш йўқлигини, сиёсатчи эрталаб суратга олган қуш эса эму эканлигини маълум қилган.
Боғ раҳбарининг сўзларига кўра, ҳайвон ёки қушларни бир неча соатга ижарага бериш ҳар қандай ҳолатда ҳам мумкин эмас. Уларни кўчириб ўтказиш катта стресс билан боғланган, ҳайвонот боғининг вазифаси эса ҳайвонларга ғамхўрлик қилиш саналади.
Изоҳ (0)