Rossiyalik ayol miyasi operatsiya qilinayotgan vaqtda fleyta chalib turdi

Rossiyalik fleytachi Sofya Pinayeva o‘z boshidagi o‘simtani olib tashlash bo‘yicha jarrohlik amaliyoti vaqtida mumtoz musiqani chalib turdi. “RIA Novosti”ning xabar berishicha, miya yarimsharlari ishlayotganini tekshirib turish uchun shunday qilingan.

Ayol Avstriyaning Grats shahrida operatsiya qilingan. Amaliyot vaqtida ayolning hushi to‘liq o‘zida bo‘lgan. Shifokorlar bemorni narkozdan chiqarib, nutq, ko‘rish, mayda motorika va miyaning boshqa funksiyalarini tekshirishga yo‘naltirilgan qator testlarni o‘tkazgan.

Xususan, ayol bu testlar vaqtida fleytada kuy ham ijro etgan. “Bax kuylaridan, Motsartdan — xayolimga nima kelsa, shuni ijro etdim”, — dedi u.

Jarroh Gord fon Kampening so‘zlariga ko‘ra, umumiy narkoz bilan amalga oshirilayotgan operatsiyalar vaqtida shifokorlar ko‘pi bilan qo‘l-oyoqning ishlamay qolganini aniqlay oladi, sezgilarning o‘rnida ekani yoki emasligini bilib bo‘lmaydi.

Natijada ayol gliomasining katta qismi olib tashlangan. Avstriyaning Kurier nashri axborotiga ko‘ra, oradan bir necha kun rossiyalik fleytachi ayol operasyaning muvaffaqiyatli o‘tganini o‘z do‘stlari bilan birga nishonlagan.