22—24-iyun kunlari usta kulollar yurti Rishton tumanida viloyat hokimligi, “Hunarmand” uyushmasi, Yoshlar ittifoqi hamkorligida O‘zbekistonda birinchi bor “Kulollar va kulolchilik mahsulotlari” I xalqaro festivali o‘tkazildi. Bu haqda “Daryo” muxbiri Azizjon Ermatov xabar berdi.
“Xalqaro festivalda Samarqand, Andijon, Buxoro va Xorazm viloyatlari hamda qoraqalpog‘istonlik yetuk kulol ustalar shajaralarining vakillari o‘n mingga yaqin kulolchilik mahsulotlari bilan qatnashdi. Ko‘rgazmaga qo‘yilgan asarlar Yaponiya, Fransiya, Vengriya, Belorussiya, Buyuk Britaniya, Rossiya Federatsiyasi, Tojikiston hamda Turkiya kabi xorijiy davlatlardan tashrif buyurgan sayyohlarning hayratiga sabab bo‘ldi”, – deydi Rishton tuman hokimining o‘rinbosari Abdusalom Siddiqov.
Farg‘ona vodiysidagi Rishton shahriga taxminan eramizdan avvalgi II yilda asos solingan. U azaldan kulollari va ajoyib sopol buyumlari bilan shuhrat qozongan. Rishtonda kulolchilik buyumlarini yaratish, pishirish va ishlov berishning betakror texnologiyasi ishlab chiqilgan. Rishton kulolchiligining yana bir afzalligi shundaki, vaqt o‘tgan sari ko‘plab mintaqalarda kulolchilik san’ati an’analari unut bo‘lgan esa-da, Rishtonda bu soha o‘z texnikasi va uslubiga sodiq qolgan holda rivojlanavergan. Hozirda Rishtonda minglab kulollar mehnat qiladi. Rishtonlik ustalar yaratgan san’at asarlari dunyodagi turli muzeylar kolleksiyalariga kirgan. Bu san’at asarlari AQSh, Buyuk Britaniya, Fransiya, Polsha, Shvetsiya, Iroq, Eron, Misr kabi mamlakatlarda bo‘lib o‘tgan xalqaro ko‘rgazma va yarmarkalarda ko‘p marotaba namoyish qilingan.
“Bunday tadbirlar mahalliy hunarmandlarni dunyoga tanitadi, ularni yangi ijodiy ishlarga ilhomlantiradi. Ota-bobolarimiz bu hunarni o‘rganib, shu orqali ro‘zg‘or tebratishni boshlaganlariga qariyb 300 yil bo‘ldi. Mana, uch asrdirki, bizning sulolamizda o‘ziga xos kulolchilik maktabi yaratilgan”, – deydi kulollar sulolasining beshinchi avlodi Botirjon Bobojonov.
Rishton kulollari tomonidan tayyorlangan mahsulotlar o‘zining dizayni, tabiiy rangi va qalampir nusxali naqshlarga boyligi bilan ajralib turadi. Arxeologlar tomonidan olib borilgan qazishmalar, Katta Farg‘ona kanali qurilishi paytida Rishton shahri va Zohidon qishlog‘i hududlaridan topilgan sopol buyumlar va uy ro‘zg‘or ashyolari, shuningdek, turli manbalarda keltirilgan ma’lumotlarga ko‘ra, Rishton eramizdan avvalgi asrlarda ham madaniyat o‘choqlaridan biri bo‘lgan.
Rishtonda usta Ibrohimjon Komilov, Bobojon Nishonov, Hakimjon Sattorov, Sharofiddin Yusupov singari mashhur kulollar maktabi yaratilgan.
“Festivalda 100 turdan ortiq kulolchilik mahsulotlari bilan qatnashdim. Mahsulotlarimda boshqalar ishlatmagan milliy adras, atlas ranglaridan foydalanib, noan’anaviy gultuvaklar, suvenirlar, servislar, choynak-piyola, turli hajmdagi guldonlar yasayman”, – rishtonlik kulol Iqbol To‘laganov.
Izoh (0)