22—24 июнь кунлари уста кулоллар юрти Риштон туманида вилоят ҳокимлиги, «Ҳунарманд» уюшмаси, Ёшлар иттифоқи ҳамкорлигида Ўзбекистонда биринчи бор «Кулоллар ва кулолчилик маҳсулотлари» I халқаро фестивали ўтказилди. Бу ҳақда «Дарё» мухбири Азизжон Эрматов хабар берди.
«Халқаро фестивалда Самарқанд, Андижон, Бухоро ва Хоразм вилоятлари ҳамда қорақалпоғистонлик етук кулол усталар шажараларининг вакиллари ўн мингга яқин кулолчилик маҳсулотлари билан қатнашди. Кўргазмага қўйилган асарлар Япония, Франция, Венгрия, Белоруссия, Буюк Британия, Россия Федерацияси, Тожикистон ҳамда Туркия каби хорижий давлатлардан ташриф буюрган сайёҳларнинг ҳайратига сабаб бўлди», – дейди Риштон туман ҳокимининг ўринбосари Абдусалом Сиддиқов.
Фарғона водийсидаги Риштон шаҳрига тахминан эрамиздан аввалги II йилда асос солинган. У азалдан кулоллари ва ажойиб сопол буюмлари билан шуҳрат қозонган. Риштонда кулолчилик буюмларини яратиш, пишириш ва ишлов беришнинг бетакрор технологияси ишлаб чиқилган. Риштон кулолчилигининг яна бир афзаллиги шундаки, вақт ўтган сари кўплаб минтақаларда кулолчилик санъати анъаналари унут бўлган эса-да, Риштонда бу соҳа ўз техникаси ва услубига содиқ қолган ҳолда ривожланаверган. Ҳозирда Риштонда минглаб кулоллар меҳнат қилади. Риштонлик усталар яратган санъат асарлари дунёдаги турли музейлар коллекцияларига кирган. Бу санъат асарлари АҚШ, Буюк Британия, Франция, Польша, Швеция, Ироқ, Эрон, Миср каби мамлакатларда бўлиб ўтган халқаро кўргазма ва ярмаркаларда кўп маротаба намойиш қилинган.
«Бундай тадбирлар маҳаллий ҳунармандларни дунёга танитади, уларни янги ижодий ишларга илҳомлантиради. Ота-боболаримиз бу ҳунарни ўрганиб, шу орқали рўзғор тебратишни бошлаганларига қарийб 300 йил бўлди. Мана, уч асрдирки, бизнинг сулоламизда ўзига хос кулолчилик мактаби яратилган», – дейди кулоллар сулоласининг бешинчи авлоди Ботиржон Бобожонов.
Риштон кулоллари томонидан тайёрланган маҳсулотлар ўзининг дизайни, табиий ранги ва қалампир нусхали нақшларга бойлиги билан ажралиб туради. Археологлар томонидан олиб борилган қазишмалар, Катта Фарғона канали қурилиши пайтида Риштон шаҳри ва Зоҳидон қишлоғи ҳудудларидан топилган сопол буюмлар ва уй рўзғор ашёлари, шунингдек, турли манбаларда келтирилган маълумотларга кўра, Риштон эрамиздан аввалги асрларда ҳам маданият ўчоқларидан бири бўлган.
Риштонда уста Иброҳимжон Комилов, Бобожон Нишонов, Ҳакимжон Сатторов, Шарофиддин Юсупов сингари машҳур кулоллар мактаби яратилган.
«Фестивалда 100 турдан ортиқ кулолчилик маҳсулотлари билан қатнашдим. Маҳсулотларимда бошқалар ишлатмаган миллий адрас, атлас рангларидан фойдаланиб, ноанъанавий гултуваклар, сувенирлар, сервислар, чойнак-пиёла, турли ҳажмдаги гулдонлар ясайман», – риштонлик кулол Иқбол Тўлаганов.
Изоҳ (0)