“Katta yettilik” mamlakatlari sammitida AQSh prezidenti Donald Tramp Germaniya kansleri Angela Merkelning qarshisidagi stolga konfet sochgan. Bu haqda Eurasia Group konsalting kompaniyasi direktori Yen Bremmer CBS telekanaliga ma’lum qildi, deb yozadi “Vedomosti”.
Siyosatshunosning so‘zlariga ko‘ra, bu G7 yetakchilari sammit yakunlari bo‘yicha qo‘shma hujjat imzolamoqchi bo‘lgan vaqtda yuz bergan. Tramp o‘rnidan turgan, qo‘lini cho‘ntagiga solib, ikkita Starburst konfetini chiqargan va ularni stolga tashlagan. So‘ng Merkelga qarab: “Mana, Angela, sizga hech narsa bermasligim haqida gapirmang”, — degan.
“Merkel va Kanada bosh vaziri Jastin Tryudo Tramp qo‘shma kommyunikeni imzolashi uchun unga bosim o‘tkazmoqchi bo‘lgan, Amerika prezidenti esa G7 yetakchilari unga qarshi birlashayotganidan norozi bo‘lgan”, — deya siyosatshunos AQSh prezidentining xatti-harakatlarini izohladi.
2018-yil 8—9-iyun kunlari Kanadaning Kvebek shahrida bo‘lib o‘tgan G7 sammiti natijalari bo‘yicha yetti mamlakat yakuniy bayonotni imzolagani haqida Tryudo ma’lum qilgan edi. Ammo Tramp o‘z Twitter’ida AQSh vakillaridan kommyunikeni qo‘llab-quvvatlamaslikni so‘ragani haqida yozdi.
Izoh (0)