Germaniyada Audi rahbariga nisbatan tergov boshlandi

Dizel bilan bog‘liq mojarolar doirasida Myunxen prokuraturasi Audi avtomobil konserni rahbari Rupert Shtadlerga nisabatan tergov boshladi. Prokuratura vakili tomonidan ma’lum qilinishicha, Shtadler ishda 30-maydan buyon ayblanuvchi sifatida ishtirok etmoqda, deb yozadi “Korrespondent.net”.

Bundan tashqari, Audi boshqaruvining ismi ma’lum qilinmagan a’zosi uyida ham tintuv o‘tkazilgan. Shtadler bilan bog‘liq vaziyat kabi bu yerda ham gap firibgarlik haqida ketmoqda.

Tergovga ko‘ra, ishning ikkala ishtirokchisi ham Yevropadagi iste’molchilarga chiqindi gazlardagi zararli moddalar haqidagi ma’lumotlari o‘zgartirilgan avtomobillar sotishga aloqador bo‘lgan.

Myunxen prokuraturasi tomonidan Audi konserniga nisbatan ochilgan ish bo‘yicha ayblanayotganlar soni 20 kishiga yetgan. O‘tgan haftada Avtomobil transport federal idorasi 60 mingta A6 va A7 modeli rasman chaqirib olingani haqida ma’lum qilgan.