Avstraliyalik yarim himoyachi Rostin Griffits bilan “Paxtakor” jamoasi o‘rtasida tuzilgan shartnoma ikki tomon kelishuvi asosida bekor qilindi. Bu haqda klub matbuot xizmati xabar berdi.
Ma’lumot uchun “Paxtakor” 2017-yilning yozida Griffits bilan 2018-yil oxirigacha shartnoma tuzgandi. Ta’kidlanishicha, klub vа futbolchi ushbu shartnomani muddatidan ilgari yakunlashga kelishib olgan. Endilikda 1-iyundan boshlab Griffits “Paxtakor” futbolchisi hisoblanmaydi.
“O‘zbekistondagi faoliyatim yakuniga yetdi. Men va ”Paxtakor“ rahbariyati shartnomani ertaroq bekor qilishga o‘zaro kelishib oldik. Rafiqam va men bu yerda 10 oy davomida yaxshi taassurotlarga ega bo‘ldik. O‘zim ham kerakli tajribani orttirdim. Ushbu klubga o‘zimning eng ezgu tilaklarimni tilayman va “Paxtakor”ning liga chempionligini qo‘lga kiritishini istayman. Ushbu qarorga kelishimda katta yordam bergan Buddi Faraxga katta rahmat aytaman”, — deb yozadi futbolchi Twitter’dagi sahifasida.
Rostin Griffits futbolchilik faoliyati davomida “Blekbern Rovers” (Angliya, 2006–2009), “Gretna” (Shotlandiya, 2008), “Akkrington Stenli” (Angliya, 2008), “Adelaida Yunayted” (Avstraliya, 2009), “Nort Kvinslend Furi” (Avstraliya, 2009–2010), “Sentral Kost Mariners” (Avstraliya, 2011–2012), “Guanchjou Fuli” (Xitoy, 2012–2014), “Pert Glori” (Avstraliya, 2014–2015 va 2016–2017) va “Roda” (Gollandiya, 2016–2017) klublarida to‘p surgan.
Izoh (0)