Австралиялик ярим ҳимоячи Ростин Гриффитс билан «Пахтакор» жамоаси ўртасида тузилган шартнома икки томон келишуви асосида бекор қилинди. Бу ҳақда клуб матбуот хизмати хабар берди.
Маълумот учун «Пахтакор» 2017 йилнинг ёзида Гриффитс билан 2018 йил охиригача шартнома тузганди. Таъкидланишича, клуб вa футболчи ушбу шартномани муддатидан илгари якунлашга келишиб олган. Эндиликда 1-июндан бошлаб Гриффитс «Пахтакор» футболчиси ҳисобланмайди.
«Ўзбекистондаги фаолиятим якунига етди. Мен ва »Пахтакор« раҳбарияти шартномани эртароқ бекор қилишга ўзаро келишиб олдик. Рафиқам ва мен бу ерда 10 ой давомида яхши таассуротларга эга бўлдик. Ўзим ҳам керакли тажрибани орттирдим. Ушбу клубга ўзимнинг энг эзгу тилакларимни тилайман ва «Пахтакор»нинг лига чемпионлигини қўлга киритишини истайман. Ушбу қарорга келишимда катта ёрдам берган Будди Фарахга катта раҳмат айтаман», — деб ёзади футболчи Twitter’даги саҳифасида.
Ростин Гриффитс футболчилик фаолияти давомида «Блекбэрн Роверс» (Англия, 2006–2009), «Гретна» (Шотландия, 2008), «Аккрингтон Стенли» (Англия, 2008), «Аделаида Юнайтед» (Австралия, 2009), «Норт Квинсленд Фури» (Австралия, 2009–2010), «Сентрал Кост Маринерс» (Австралия, 2011–2012), «Гуанчжоу Фули» (Хитой, 2012–2014), «Перт Глори» (Австралия, 2014–2015 ва 2016–2017) ва «Рода» (Голландия, 2016–2017) клубларида тўп сурган.
Изоҳ (0)