Perm o‘lkasida ikki nafar qamoqqa olingan shaxs terrorchilar safiga odam yollashda ayblanmoqda. Bu haqda Rossiya FXX matbuot xizmati ma’lum qildi, deya xabar beradi Sputnik.
Qayd etilishicha, terrorchilikda ayblanib 15 yilga qamalgan Dog‘iston fuqarosi va narkotik moddalar saqlashda ayblangan O‘zbekiston fuqarosi qamoqxona ichida ekstremistik guruh tashkil qilgan.
“Ular qamalganlar orasidan Rossiyada ta’qiqlangan ‘Al-Qoida’ va ISHID terrorchi tashkilotlari safiga odam yollashga, radikal islom oqimini qo‘llab-quvvatlashga uringan, noqonuniy qurollangan guruhlarga qo‘shilishga undagan”, — deyiladi FXX xabarida.
Jinoyatchilarga nisbatan Rossiya JK 205.2 bandining 1-bo‘limiga muvofiq (“Ommaviy shaklda terrorchilikka undash, ommaviy ravishda terrorchilikni oqlash”) jinoiy ish qo‘zg‘atilgan. Ayni damda tergovchilar dalillar izlash va jinoyatchilarning boshqa noqonuniy ishlarini aniqlash bilan shug‘ullanmoqda.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)