Britaniyalik millioner bloger avtoturargohdagi mashinalarni turtib yuborgani uchun bolg‘a bilan do‘pposlandi

Britaniyalik millioner bloger Lord Aleemni (haqiqiy ismi — Alim Iqbol) politsiya qo‘lga oldi. Bunga uning mashinasi boshqa mashinalarni turtib o‘tgani sabab bo‘lgan, deb xabar beradi The Birmingham Live.

Politsiyachilarning ma’lumotlariga ko‘ra, 23 yoshli You Tube “yulduzi” o‘zining Mercedes mashinasida Birmingem ko‘chasida turgan avtomobillarni turtib yuborishi natijasida yuzaga kelgan janjal oqibatida jarohat olgan. Shikast yetgan avtomobillar egalari haydovchini bolg‘a bilan urgani aytilmoqda.

Voqea joyiga uch nafar qurollangan politsiya ofitseri yetib kelgan: ular uch kishini ushlagan, biroq birortasini hibsga olmagan. Keyinroq Lord Aleem shifoxonaga yo‘l olgan, uning avtomobilini esa politsiyachilar ekspertiza uchun olib ketishgan.

Noxush hodisadan bir necha soat oldin Lord Aleem ijtimoiy tarmoqqa qora rangli Mercedes G-Class yonida tushgan suratini joylashtirgan edi. Uning ostiga yozilgan izohga ko‘ra, bloger BBC’ga intervyu berish uchun ketayotgan bo‘lgan.