O‘zbekiston Tashqi savdo vazirligida 10-may kuni Isroilning O‘zbekistondagi favqulodda va muxtor elchisi Eduard Shapiro bilan uchrashuv bo‘lib o‘tdi. Bu haqda UzDaily xabar berdi.
Uchrashuv boshida tashqi savdo vaziri Jamshid Xo‘jayev ikki mamlakat o‘rtasidagi savdo-iqtisodiy munosabatlarning joriy holati yuzasidan ma’lumot berdi. Xususan, o‘tgan yilda ikki mamlakat o‘rtasidagi savdo aylanmasi 41 million dollarni, shu jumladan, eksport 15,1 million, import esa 29 million dollarni tashkil qilgan.
Savdo-iqtisodiy hamkorlikni kelajakda rivojlantirish yuzasidan aniq takliflarni ishlab chiqish maqsadida vazirlik O‘zbekiston va Isroil o‘rtasidagi savdo-iqtisodiy hamkorlik bo‘yicha hukumatlararo komissiyaning birinchi yig‘ilishini joriy yilda o‘tkazishni taklif qildi. Bunda Isroilning yetakchi kompaniyalari uchun O‘zbekistonda yaratilgan sharoitlarni namoyish etish uchun biznes-forum tashkil qilish ham ko‘zda tutiladi.
Isroil elchisi ham mazkur tashabbusni qo‘llab-quvvatladi va bu ikki mamlakat o‘rtasidagi savdo-iqtisodiy hamkorlikni rivojlantirishda katta qadam bo‘lishini qayd etdi.
Izoh (0)