Ўзбекистон Ташқи савдо вазирлигида 10 май куни Исроилнинг Ўзбекистондаги фавқулодда ва мухтор элчиси Эдуард Шапиро билан учрашув бўлиб ўтди. Бу ҳақда UzDaily хабар берди.
Учрашув бошида ташқи савдо вазири Жамшид Хўжаев икки мамлакат ўртасидаги савдо-иқтисодий муносабатларнинг жорий ҳолати юзасидан маълумот берди. Хусусан, ўтган йилда икки мамлакат ўртасидаги савдо айланмаси 41 миллион долларни, шу жумладан, экспорт 15,1 миллион, импорт эса 29 миллион долларни ташкил қилган.
Савдо-иқтисодий ҳамкорликни келажакда ривожлантириш юзасидан аниқ таклифларни ишлаб чиқиш мақсадида вазирлик Ўзбекистон ва Исроил ўртасидаги савдо-иқтисодий ҳамкорлик бўйича ҳукуматлараро комиссиянинг биринчи йиғилишини жорий йилда ўтказишни таклиф қилди. Бунда Исроилнинг етакчи компаниялари учун Ўзбекистонда яратилган шароитларни намойиш этиш учун бизнес-форум ташкил қилиш ҳам кўзда тутилади.
Исроил элчиси ҳам мазкур ташаббусни қўллаб-қувватлади ва бу икки мамлакат ўртасидаги савдо-иқтисодий ҳамкорликни ривожлантиришда катта қадам бўлишини қайд этди.
Изоҳ (0)