O‘zbekistondagi ta’lim muassasalarida Inson huquqlari umumjahon deklaratsiyasi qabul qilinganining 70 yilligiga bag‘ishlangan umummilliy dars o‘tkaziladi

Prezident Shavkat Mirziyoyev “Inson huquqlari umumjahon deklaratsiyasi qabul qilinganining 70 yilligiga bag‘ishlangan tadbirlar dasturi to‘g‘risida”gi farmonni imzoladi. Hujjat matni O‘zA tomonidan keltirildi.

Farmonga muvofiq mazkur tadbirlar dasturi tasdiqlandi. Uni amalga oshirish bo‘yicha komissiya tashkil etildi.

Komissiyaning asosiy vazifalari etib quyidagilar belgilandi:

Dasturda ko‘zda tutilgan tadbirlarni amalga oshirishga mas’ul bo‘lgan ijrochilarning faoliyatini muvofiqlashtirish;

Dasturda ko‘zda tutilgan tadbirlar ijrosini tashkil qilishga va ularning o‘z vaqtida ijro etilishi monitoringini amalga oshirishga har taraflama ko‘maklashish;

Inson huquqlari umumjahon deklaratsiyasi qabul qilinganining 70 yilligiga bag‘ishlangan xalqaro tadbirlarda O‘zbekiston vakillarining faol ishtirok etishi bo‘yicha xalqaro tashkilotlar, eng avvalo, BMT muassasalari bilan yaqin hamkorlik qilishini ta’minlash;

Inson huquqlari umumjahon deklaratsiyasi qabul qilinganining 70 yilligiga bag‘ishlangan tadbirlar, demokratik, ijtimoiy-iqtisodiy, ijtimoiy-siyosiy islohotlarni chuqurlashtirish bo‘yicha amalga oshirilayotgan keng ko‘lamli ishlarni ommaviy axborot vositalarida keng yoritilishini tashkil etish.

Oliy va o‘rta maxsus ta’lim hamda Xalq ta’limi vazirliklariga O‘zbekiston yoshlar ittifoqi bilan birgalikda 2018-yil 10-dekabrda barcha maktab, litsey, kollej, oliy ta’lim muassasalarida Inson huquqlari umumjahon deklaratsiyasi qabul qilinganining 70 yilligiga bag‘ishlangan umummilliy dars o‘tkazish topshirildi.