Kattaqo‘rg‘onlik Hamid Samatov Ikkinchi jahon urushi yillarida ikki marta qahramonlik ko‘rsatadi: birinchisi Stalingrad va Ukraina jang maydonlarida bo‘lsa, ikkinchisi fuqarolik burchini ado etishda. Bu haqda Sputnik hikoya qilmoqda.
1944-yil. Urushda og‘ir jarohat olib uyiga qaytayotgan Hamid Samatov Kattaqo‘rg‘on vokzalida yog‘och uycha ichida sovuqdan yashirinib o‘tirgan bolaga ko‘zi tushadi. Ko‘rinishi juda oriq bolakayga uning rahmi keladi va o‘zi bilan uyiga olib keladi.
Tong saharda uyga kirib kelgan Hamidni ota-onasi xursandchilik bilan kutib oladi. O‘g‘li frontdan qaytib kelganiga mamnun bo‘lishadi, lekin uni yosh bola bilan ko‘rib: “Ha bolam, hamma urush qilayotganda, sen uylandingmi?” deb so‘rashadi. Hamid bo‘lgan voqeani aytib beradi.
Samatov ko‘chada qarovsiz qolgan bolani ko‘rsa, chidab tura olmagan — uyiga olib kelavergan. Bir safar uch bolani, yana bir safar kuchugidan ajralishni istamagan bolakayni kuchugi bilan birga uyiga olib kelgan.
Eng qiyin, ochgarchilik vaqtlarni Hamid aka shunday eslaydi. “Uyda 13 bolakay, oziq-ovqat qolmagan. Bolalardan ikki nafari ochlikdan o‘lish arafasiga kelib qolgan”. O‘shanda u shinel va etigini olib bozorga chiqadi va ularni to‘rt xalta kepakka almashtirib keladi. Bolalar xursand bo‘ladi.Lekin ertasi kuni voyenkom uni harbiy kiyimsiz ko‘rib, qattiq koyiydi, “Sen nima, frontovik bo‘la turib, shinel va etigingni sotib ichdingmi? Axir bu sharmandalik-ku?”, — deya jahl qiladi u.
— Yo‘q, o‘rtoq polkovnik. Men bolalarimga ovqat sotib olish uchun sotdim, — deydi Samatov.
“Nechta bolang bor?” deb savol berilganda Hamid “13 ta”, deb javob beradi. Polkovnik uning so‘zlariga ishonmay, shu kunning o‘zidayoq Hamidning uyiga mashinada keladi. Vaziyatni ko‘rib, biron so‘z aytmay uni quchoqlaydi.
Shundan so‘ng uch yil davomida polkovnik Akimov oilaga doimo yordam yuborib turadi. “O‘sha, ocharchilik yillarida bu juda katta yordam bo‘ldi”, — deya eslaydi Hamid aka.
Kunlardan bir kun Hamidning ota-onasi uni uylantirishga qaror qiladi. Hamid bo‘lsa “Axir mening bolalarim bor-ku, qaysi qiz menga turmushga chiqishga rozi bo‘ladi?” deb javob qaytaradi.
Lekin shunday qiz topiladi. Qo‘shnisining qizi Sanobar Hamidga turmushga chiqishga rozi bo‘ladi.
“Hamid aka va Sanobar opa to bizlarni oyoqqa turg‘izmaguncha ataylab o‘z bolalarini dunyoga keltirishmadi. Keyinchalik esa ular besh o‘g‘il va bir qizli bo‘lishdi. Hozir ularning hamma bolalari o‘sib, ulg‘ayib, butun sobiq Ittifoq bo‘ylab tarqalib ketishgan”, — hikoya qiladi Hamid Samatov asrab olgan to‘ng‘ich o‘g‘il San’at.
Hamid akaning barcha farzand, nevara va evaralari ushbu oilaga to‘plangan kunlarda hovliga 100 dan ortiq kishi jamlanadi.
Izoh (0)