Каттақўрғонлик Ҳамид Саматов: 13 болани асраб олган яна бир ўзбек Шомаҳмудови

Каттақўрғонлик Ҳамид Саматов Иккинчи жаҳон уруши йилларида икки марта қаҳрамонлик кўрсатади: биринчиси Сталинград ва Украина жанг майдонларида бўлса, иккинчиси фуқаролик бурчини адо этишда. Бу ҳақда Sputnik ҳикоя қилмоқда.

1944 йил. Урушда оғир жароҳат олиб уйига қайтаётган Ҳамид Саматов Каттақўрғон вокзалида ёғоч уйча ичида совуқдан яшириниб ўтирган болага кўзи тушади. Кўриниши жуда ориқ болакайга унинг раҳми келади ва ўзи билан уйига олиб келади.

Тонг саҳарда уйга кириб келган Ҳамидни ота-онаси хурсандчилик билан кутиб олади. Ўғли фронтдан қайтиб келганига мамнун бўлишади, лекин уни ёш бола билан кўриб: «Ҳа болам, ҳамма уруш қилаётганда, сен уйландингми?» деб сўрашади. Ҳамид бўлган воқеани айтиб беради.

Саматов кўчада қаровсиз қолган болани кўрса, чидаб тура олмаган — уйига олиб келаверган. Бир сафар уч болани, яна бир сафар кучугидан ажралишни истамаган болакайни кучуги билан бирга уйига олиб келган.

Энг қийин, очгарчилик вақтларни Ҳамид ака шундай эслайди. «Уйда 13 болакай, озиқ-овқат қолмаган. Болалардан икки нафари очликдан ўлиш арафасига келиб қолган». Ўшанда у шинел ва этигини олиб бозорга чиқади ва уларни тўрт халта кепакка алмаштириб келади. Болалар хурсанд бўлади.Лекин эртаси куни военком уни ҳарбий кийимсиз кўриб, қаттиқ койийди, «Сен нима, фронтовик бўла туриб, шинел ва этигингни сотиб ичдингми? Ахир бу шармандалик-ку?», — дея жаҳл қилади у.

— Йўқ, ўртоқ полковник. Мен болаларимга овқат сотиб олиш учун сотдим, — дейди Саматов.

«Нечта боланг бор?» деб савол берилганда Ҳамид «13 та», деб жавоб беради. Полковник унинг сўзларига ишонмай, шу куннинг ўзидаёқ Ҳамиднинг уйига машинада келади. Вазиятни кўриб, бирон сўз айтмай уни қучоқлайди.

Шундан сўнг уч йил давомида полковник Акимов оилага доимо ёрдам юбориб туради. «Ўша, очарчилик йилларида бу жуда катта ёрдам бўлди», — дея эслайди Ҳамид ака.

Кунлардан бир кун Ҳамиднинг ота-онаси уни уйлантиришга қарор қилади. Ҳамид бўлса «Ахир менинг болаларим бор-ку, қайси қиз менга турмушга чиқишга рози бўлади?» деб жавоб қайтаради.

Лекин шундай қиз топилади. Қўшнисининг қизи Санобар Ҳамидга турмушга чиқишга рози бўлади.

«Ҳамид ака ва Санобар опа то бизларни оёққа турғизмагунча атайлаб ўз болаларини дунёга келтиришмади. Кейинчалик эса улар беш ўғил ва бир қизли бўлишди. Ҳозир уларнинг ҳамма болалари ўсиб, улғайиб, бутун собиқ Иттифоқ бўйлаб тарқалиб кетишган», — ҳикоя қилади Ҳамид Саматов асраб олган тўнғич ўғил Санъат.

Ҳамид аканинг барча фарзанд, невара ва эваралари ушбу оилага тўпланган кунларда ҳовлига 100 дан ортиқ киши жамланади.