Namangan shahridagi “Hidoya” o‘rta maxsus islom bilim yurtida “Hadisi sharif bilimdoni” respublika tanlovining Namangan viloyati bosqichi o‘tkazildi. Bu haqda jurnalist Oqilxon Dadaboyev ma’lum qildi.
Unda hadis ilmiga qiziqqan 14 yoshdan 30 yoshgacha bo‘lgan 75 nafar ishtirokchi o‘zaro bellashdi.
Musobaqa nizomiga muvofiq, ishtirokchilar Imom Buxoriyning “Al-Adab Al-Mufrad”asaridagi hadislardan ikki yuztasi asosida baholandi.
Tanlovning ilk shartida qatnashchilar Imom Buxoriy va Imom Termiziyning hayoti, ilmiy faoliyatini yoritishga intildi. Keyingi shartda esa berilgan hadis sharhlab o‘tildi, shuningdek hadisni tarjima qilish va unga doir hukmlar bayon qilindi. Musobaqaning yakuniy shartida qatnashchilar bittadan hadisning arab tilidagi matnini roviylari bilan yoddan aytib berdi.
Hakamlar hay’atining xulosasiga ko‘ra, erkaklar o‘rtasida Mirkamol Mahkamov, Saidasrorxon Naqibxonov va Muhammad Botirov, ayollar o‘rtasida esa Malikaxon Mirzayeva, Habibaxon Usmonova va Zulfiya Ma’rufxo‘jayeva g‘olib chiqdi.
Musobaqa g‘oliblari O‘zbekiston musulmonlari idorasi Namangan viloyati vakilligi tomonidan maxsus diplom va esdalik sovg‘alari bilan taqdirlandi. Birinchi o‘rinni egallagan g‘oliblar tanlovning respublika bosqichida ishtirok etish huquqini qo‘lga kiritdi.
Izoh (0)