Uy joy qurish uchun mo‘ljallanmagan hududda uy qurib 15 yildan ortiq muddatda yashab kelayotgan fuqarolarga ushbu turar joyga nisbatan mulk huquqi beriladi. Bu haqda Xalqaro press-klubning “Fuqarolarni ijtimoiy qo‘llab-quvvatlash bo‘yicha qo‘shimcha chora-tadbirlar hamda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha bir martalik umumdavlat aksiyasini o‘tkazish to‘g‘risida”gi Prezident farmoni ahamiyati va ijrosiga bag‘ishlangan sessiyasida ma’lum qilindi.
Muhofaza qilinadigan joylarda, shaharsozlik normalariga zid, qizil zonalarga tushgan joylarda qurilgan uylar egalariga esa mulk huquqi berilmaydi. Bu esa aholiga zarar yetkazmaslik maqsadida ko‘rilayotgan chora hisoblanadi.
Farmonning yana bir tomoni mavjud, ya’ni 2019-yilning 1-mayiga qadar ajratilgan uy-joy qurish uchun mo‘ljallanmagan yerlarda qurilish ishlari amalga oshirilmagan bo‘lsa, bu joylar zaxiraga olinadi va boshqa ehtiyojmand fuqarolarga beriladi.
Sessiyada qayd etilishicha, O‘zbekistondagi 6 253 608 ta ko‘chmas mulkdan 1 107 733 tasi hech qayerda ro‘yxatdan o‘tkazilmagan.
Respublikada o‘zboshimchalik bilan egallab olingan yer uchastkalari 56 mingta, o‘zboshimchalik bilan noqonuniy tarzda qurib olingan uy-joylar esa 183 mingtani tashkil etadi.
Fuqarolarga yer uchastkalarini uy-joy qurish uchun muayyan to‘lov evaziga noqonuniy berish yuzasidan fermer va dehqon ho‘jaliklarining til biriktirishi bo‘yicha ko‘plab holatlar mavjud.
Natijada ushbu muammo butun respublika bo‘yicha ommaviy tus oldi va uy-joy uchun zarur hujjatlarning mavjud emasligi aholida boshqa ijtimoiy muammolarning kelib chiqishiga, xususan, haqiqatda yashab turgan joyga propiska qilinishi, mulk huquqiga ega bo‘lish va uni amalga oshirish imkoniyati mavjud emasligiga olib keldi.
Fuqarolarning uy-joy mulkiga kadastr hujjatlarini berishni so‘rab O‘zbekiston Respublikasi Prezidentining virtual qabulxonasiga 5 mingdan ortiq, deputatlar, senatorlar, davlat hokimiyati organlari mansabdor shaxslari tomonidan o‘tkazilgan sayyor qabullarda 3 mingdan ziyod murojaatlari kelib tushgan.
Izoh (0)