30-aprel kuni Jinoyat ishlari bo‘yicha Toshkent shahar sudida O‘zbekiston konstitutsion tuzumiga tajovuz qilishda ayblanayotgan Bobomurod Abdulla, Hayotxon Nasriddinov, Shavkat Olloryorov va Ravshan Salayevlarga nisbatan navbatdagi sud majlisi bo‘lib o‘tdi, deb xabar beradi “Gazeta.uz”.
Sud jarayonida “Usmon Haqnazarov” taxallusi ostida e’lon qilingan matnlar bo‘yicha qayta o‘tkazilgan ekspertiza natijalariga ma’lum qilindi. Qayta ekspertiza Bobomurod Abdullayevning advokati Sergey Mayorovning iltimosnomasiga asosan o‘tkazilgan.
“Usmon Haqnazarov” matnlari ustida sud-filologik (muallifligini aniqlash maqsadida matn ustida o‘tkaziladigan ekspertiza), sud-politologik-lingvistik va sud-filologik ekspertizalar yana o‘sha mutaxassislar tomonidan qayta o‘tkazildi. Himoyachi tomon avvalroq bir necha bor dastlabki ekspertizani o‘tkazishda tartib-qoidalar buzilganini ma’lum qilgandi. Bu ekspertlar tomonidan ham tan olingan.
Qayta o‘rganish asnosida ma’lum bo‘ldiki, “Usmon Haqnazarov” taxallusi ostida yozilgan 142 ta maqolaning 66 tasini Bobomurod Abdulla Muhammad Solih bilan hammualliflikda yozilgan. “Ekspertiza Hayotxon Narsiddinov matnlar muallifi yoki hammuallifi emasligini ko‘rsatdi”, — degan Sergey Mayorov.
2017-yilgacha bo‘lgan maqolalarda O‘zbekiston konstitutsiyaviy tuzumiga tajovuz qilish, hokimiyatni qo‘lga olish, hokimiyatning qonuniy ravishda saylangan vakillarini olib tashlashga qaratilgan g‘oyalar mavjud degan xulosaga kelingan. Maqolalarda noqonuniy qurolli tuzilmalar tashkil etish, mafkuraviy va siyosiy dushmanlik asosida ommaviy tartibsizliklarni amalga oshirishga ko‘maklashishni targ‘ib qilingan bo‘lsa-da, ammo irqiy va diniy nafrat targ‘ib etilmagan.
Shuningdek, ekspertizaga ko‘ra, o‘zbek tilidagi maqolalarning muallifi faqatgina Bobomurod Abdulla hisoblanadi. Sudlanuvchining o‘zi o‘zbek tilidagi maqolalar muallifi ekanligini tan olmadi.
Advokat O.Pitirimov va N.To‘laganovga Abdullayev hamda Solih tomonidan yozilgan maqolalarni alohida ajratib olish mumkinmi deya bergan savoliga, “bu imkonsiz” javobi olingan.
“Ekspertizaga ko‘ra, hukumatni ag‘darish va shunga o‘xshash harakatlarga chorlovlar aks etgan abzaslar soni 10—12 taga teng. Barcha holatlarda abzaslarning muallifi aynan kim ekanligini aniqlash imkonsizligi aytildi”, — deydi Sergey Moyorov.
Bundan tashqari ekspertlar xulosasida yozilishicha, “Usmon Haqnazarov” 2017-yilda “ancha yumshoq xarakter”da bo‘lgan.
Sud majlisi yakunida Sergey Mayorov o‘zining himoyasi ostidagi shaxs tomonidan O‘zbekiston Prezidenti Shavkat Mirziyoyevga maktub tayyorlangani, yuborilganini ma’lum qildi. Ushbu maktub jinoiy ish materiallariga qo‘shib qo‘yilgan.
Navbatdagi sud majlisi 2-may kuni bo‘lib o‘tadi.
Izoh (0)