Уй жой қуриш учун мўлжалланмаган ҳудудда уй қуриб 15 йилдан ортиқ муддатда яшаб келаётган фуқароларга ушбу турар жойга нисбатан мулк ҳуқуқи берилади. Бу ҳақда Халқаро пресс-клубнинг «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида»ги Президент фармони аҳамияти ва ижросига бағишланган сессиясида маълум қилинди.
Муҳофаза қилинадиган жойларда, шаҳарсозлик нормаларига зид, қизил зоналарга тушган жойларда қурилган уйлар эгаларига эса мулк ҳуқуқи берилмайди. Бу эса аҳолига зарар етказмаслик мақсадида кўрилаётган чора ҳисобланади.
Фармоннинг яна бир томони мавжуд, яъни 2019 йилнинг 1 майига қадар ажратилган уй-жой қуриш учун мўлжалланмаган ерларда қурилиш ишлари амалга оширилмаган бўлса, бу жойлар захирага олинади ва бошқа эҳтиёжманд фуқароларга берилади.
Сессияда қайд этилишича, Ўзбекистондаги 6 253 608 та кўчмас мулкдан 1 107 733 таси ҳеч қаерда рўйхатдан ўтказилмаган.
Республикада ўзбошимчалик билан эгаллаб олинган ер участкалари 56 мингта, ўзбошимчалик билан ноқонуний тарзда қуриб олинган уй-жойлар эса 183 мингтани ташкил этади.
Фуқароларга ер участкаларини уй-жой қуриш учун муайян тўлов эвазига ноқонуний бериш юзасидан фермер ва деҳқон ҳўжаликларининг тил бириктириши бўйича кўплаб ҳолатлар мавжуд.
Натижада ушбу муаммо бутун республика бўйича оммавий тус олди ва уй-жой учун зарур ҳужжатларнинг мавжуд эмаслиги аҳолида бошқа ижтимоий муаммоларнинг келиб чиқишига, хусусан, ҳақиқатда яшаб турган жойга прописка қилиниши, мулк ҳуқуқига эга бўлиш ва уни амалга ошириш имконияти мавжуд эмаслигига олиб келди.
Фуқароларнинг уй-жой мулкига кадастр ҳужжатларини беришни сўраб Ўзбекистон Республикаси Президентининг виртуал қабулхонасига 5 мингдан ортиқ, депутатлар, сенаторлар, давлат ҳокимияти органлари мансабдор шахслари томонидан ўтказилган сайёр қабулларда 3 мингдан зиёд мурожаатлари келиб тушган.
Изоҳ (0)