BMT eskpertlari O‘zbekistonga murojaat qilib, asbestdan foydalanmaslikka chaqirdi

Jahon sog‘liqni saqlash tashkiloti ekspertlari dunyoning barcha mamlakatlari, shu jumladan, O‘zbekiston, Qozog‘iston va Turkmanistonga murojaat qilib, asbestning barcha turlarini qazib olish, foydalanish, ishlab chiqarish va sotishni to‘liq taqiqlashga chaqirdi, deya xabar bermoqda BMT Yangiliklar markazi.

JSST ma’lumotlariga ko‘ra, ushbu moddadan foydalanish o‘pka, tuxumdon va hiqildoq saratoni, shuningdek, mezotelioma rivojlanishiga sabab bo‘lishi mumkin. Asbestdan voz kechish esa jiddiy iqtisodiy talafotlarga olib kelmaydi.

“Arzonligi va pishiqligi uchun asbestdan odamlar asrlar davomida avvalo qurilishda va chig‘iriqli detallar ishlab chiqarishda foydalanib kelgan. Ammo uning saraton kasalligini keltirib chiqarishi isbotlangach, ko‘pchilik mamlakatlar ushbu mineraldan voz kechdi”, — deyiladi maqolada.

Ayni paytda to‘rtta mamlakat — Braziliya, Xitoy, Qozog‘iston va Rossiya — dunyodagi butun asbest hajmining 99 foizini ishlab chiqaradi, 25 ta mamlakat esa yiliga kamida 1000 tonna asbest iste’mol qiladi. Iste’molning katta qismi dunyoning o‘nta mamlakati hissasiga to‘g‘ri keladi, bular — Hindiston, Xitoy, Rossiya, Braziliya, Vyetnam, Indoneziya, Qozog‘iston, Tailand, Turkmaniston va O‘zbekiston.