5-may kuni Toshkentda o‘zbek boksi yulduzlari ishtirokida professional jang oqshomi bo‘lib o‘tadi

5-may, shanba kuni Toshkentda o‘zbekistonlik professional bokschilar ishtirokida jang oqshomi bo‘lib o‘tadi. Bu haqda MOQ axborot xizmat xabar berdi.

Kechaning markaziy jangi o‘zbekistonlik Azizbek Abdug‘ofurov ishtirokida bo‘ladi. O‘sha kuni bokschi vakant bo‘lib turgan WBC Silver kamari uchun rossiyalik Dmitriy Chudinovga qarshi jang qiladi.

Ma’lumot uchun Azizbek professional ringdagi faoliyati davomida 10 ta jang o‘tkazib, ularning barchasida g‘alaba qozongan (4 tasida nokaut bilan). Tajribali Dmitriy Chudinov esa 25 ta jangda qatnashgan va ularning 21 tasida g‘alaba qozongan (13 tasi nokaut bilan). 2 ta jangda mag‘lubiyatga uchragan bo‘lsa, yana ikkita to‘qnashuvda durang qayd etgan.

Boks oqshomida, shuningdek, Qudratillo Abduqahhorov, Jamshid Najmiddinov kabi taniqli bokschilar ham ringga ko‘tariladi.

Jang oqshomi dasturidan quyidagi to‘qnashuvlar o‘rin olgan:

• Azizbek Abdug‘ofurov – Dmitriy Chudinov (Rossiya)
• Qudratillo Abduqahhorov – Tvaxa Kiduku (Tanzaniya)
• Jasur Ahmadjonov – Stevi Ongen Ferdinandus (Indoneziya)
• Olimjon Nazarov – Xvicha Gigolashvili (Gruziya)
• Jamshid Najmiddinov – Kaxa Avetisiani (Gruziya)
• Ulug‘bek Sobirov – Jorji Ungiadze (Gruziya)
• Anvar Turobov – Roy Muxlis (Indoneziya)