Urganch tumanining G‘oybu qishlog‘ida turkman millatiga mansub fuqarolar istiqomat qiladi. Ularning o‘z ona tilida ta’lim olishi, urf-odatlari va an’anlarini rivojlantirish uchun barcha sharoit yaratilgan, deb xabar beradi Prezident matbuot xizmati.
Prezident Shavkat Mirziyoyev tashabbusi bilan bu yerda o‘zbek-turkman do‘stlik uyi bunyod etildi.
“Turkmaniston Prezidenti Gurbanguli Berdimuhamedovning tashrifi asnosida ushbu ma’naviyat maskanining ochilish marosimi bo‘ldi. Davlat rahbarlari dastlab bu yerda o‘rnatilgan Maxtumquli Firog‘iy byustini ochdi, uning poyiga gullar qo‘ydi”, — deyiladi xabarda.
Shavkat Mirziyoyev va Gurbanguli Berdimuhamedov o‘zbek-turkman do‘stlik uyida yaratilgan sharoitlar bilan tanishdi. Ushbu majmua qadimiy va zamonaviy me’morchilik an’analari asosida bunyod etilgan. O‘zbek va turkman xalqlarining ko‘p asrlik aloqalarini aks ettiruvchi muzey, ikki mingdan ziyod kitob fondiga ega kutubxona tashkil qilingan. Tadbirlar o‘tkazish uchun katta zal, turli fan va san’at to‘garaklari uchun xonalar barpo etilgan.
O‘zbek-turkman do‘stlik uyi, turkman millatiga mansub fuqarolar uchun yaratilgan imkoniyatlar turkmanistonlik mehmonlarda katta taassurot qoldirdi.
Izoh (0)