O‘zbekiston va Turkmaniston o‘rtasida 2007-yilda imzolangan Do‘stona munosabatlar va har tomonlama hamkorlikni yanada mustahkamlash to‘g‘risidagi davlatlararo shartnoma ikki mamlakat hamkorligining mutlaqo yangi sahifalarini ochib, davlatlar rahbarlarining oliy darajadagi samimiy va samarali muloqotlari, xalqlar o‘rtasidagi madaniy-gumanitar aloqalarning doimiy tus olishini ta’minlamoqda. Bu haqda jurnalist Shoira Bozorova fikr yuritgan.
Bu davlatlar va xalqlar o‘rtasidagi o‘zaro ishonchni mustahkamlashga, yaxshi qo‘shnichilik, do‘stona aloqalarning rivojlanishiga xizmat qilmoqda. O‘z o‘rnida, Markaziy Osiyoda mintaqaviy xavfsizlik va barqarorlikni ta’minlashga muhim hissa qo‘shmoqda.
Prezident Shavkat Mirziyoyevning 2017-yil 6-martdaTurkmanistonga amalga oshirgan ilk davlat tashrifi ikki mamlakat o‘rtasidagi har tomonlama aloqalarning o‘zaro ishonch, hurmat asosida namoyon bo‘lishidan dalolat beradi. Gurbanguli Berdimuhamedov Shavkat Mirziyoyev O‘zbekiston Prezidenti etib saylanganidan keyin davlat tashrifi bilan birinchi bo‘lib Turkmanistonga kelgani uchun minnatdorlik bildirib, bu tarixiy voqea mamlakatlar hamkorligida foydalanilmagan imkoniyatlarni ishga solish va aloqalarni yanada mustahkamlashga xizmat qilishini alohida qayd etgan edi.
Qolaversa, Turkmanistonda O‘zbekistonning Birinchi Prezidenti haykali tiklangani ham ikki xalq bir-birining atoqli vakillarini nechog‘li ardoqlashini ko‘rsatib turibdi.
Joriy yilning 23-aprel kuni Gurbanguli Berdimuhamedovning O‘zbekistonga amalga oshirgan davlat tashrifi ikki tomonlama munosabatlarda yangi sahifa ochilishiga yanada mustahkam zamin yaratmoqda.
Xususan, O‘zbekistonga Kaspiy qirg‘og‘i port infratuzilmasidan foydalanish imkoniyatlarini o‘rganib chiqish taklif etilgani, O‘zbekiston – Turkmaniston – Kaspiy dengizi – Janubiy koridor yo‘nalishi bo‘yicha yo‘lak yaratishga qaratilgan qo‘shma ishlarga tayyorlik bildirilgani, Markaziy Osiyo – Yaqin Sharq tranzit koridorini tashkil etish bo‘yicha ishlarni realizatsiya qilish yoqlangani O‘zbekistonning jahon bozoriga chiqishida yanada keng imkoniyatlar yaratilishida muhim omil bo‘lib xizmat qiladi.
Ikki qardosh davlat o‘rtasidagi aloqlarning mustahkamlanishida madaniy sohada amalga oshirilayotgan ishlar ham alohida e’tiborga sazovor. Ikki davlat rahbarlari ishtirokida Toshkent shahrida ochilgan “Ashxobod sayilgohi” mamlakatlar o‘rtasidagi madaniy aloqalar istiqbolini belgilovchi amaliy ifoda bo‘ldi.
Izoh (0)