Adliya vazirligi tizimidagi vakant o‘rinlar haqidagi e’lon berilgan vaqtdan boshlab ishga qabul qilish to‘g‘risida 3000 dan ortiq ariza kelib tushdi. Bu haqda vazirlikning “Huquqiy axborot” Telegram-kanalida xabar berildi.
“Ularning orasida, juda bilimli va katta maqsadlarni ko‘zlovchi yoshlar, katta hayotiy tajriba va bilimga ega mutaxassislar va shunchaki yaxshi odamlar bor. Biz shuncha odamlarning o‘z karyerasi va hayotini adliya organlari bilan bog‘lamoqchi ekanligi, bizning jamoamizga qo‘shilmoqchi ekanligidan xursandmiz. Bu narsa adliya organlarining ish beruvchi sifatidagi jozibadorligi va obro‘si oshib borayotganligidan dalolat beradi”, — deyiladi xabarda.
Ta’kidlanishicha, shaxsiy ma’lumotlar (ta’lim, ish faoliyati va h.k.) sinchiklab o‘rganilgandan so‘ng maxsus komissiya ularning kasbiy bilimlarini bilish maqsadida suhbatdan o‘tkazadi.
Agar kimdir komissiya xulosasidan norozi bo‘lsa, adliya organlarining “Ishonch telefoni” yoki ijtimoiy tarmoqlardagi sahifalariga murojaat qilishi mumkin.
“Hurmatli do‘stlar, 1-mayga qadar ko‘p vaqt qolmadi, o‘z hujjatlaringizni taqdim eting, tanlovdan o‘ting va 8 ming kishidan iborat Adliya vazirligi katta jamoasining bir qismiga aylaning”, — deyiladi xabarda.
Izoh (0)