Sirdaryo viloyatidagi uchrashuvda Prezident jamiyatga juda katta zarar beradigan illat — ko‘zbo‘yamachilik haqida kuyinib gapirdi. Innovatsion rivojlanish vazirining o‘rinbosari Sherzod Shermatov Facebook’dagi sahifasida mavzu bilan bog‘liq xotiralari bilan bo‘lishdi.
“Bundan 15 yil avval Shveysariyaga Butunjahon axborot jamiyati sammitida ishtirok etish uchun hukumat delegatsiyasi tarkibida borganimizda biz uchun qiziq bir holatga guvoh bo‘lgandik.
Sammitda ishtirok etish uchun dunyoning deyarli barcha davlatlarining birinchi rahbarlari yoki hukumat rahbarlari tashrifiga qaramasdan, tadbirlar o‘tadigan joy yaqinidagi eski shahar ko‘chasida trotuarni tuzatayotgan ishchilar bemalol o‘z ishini shoshmasdan bajarayotgan edi.
Shaharga shuncha nufuzli mehmonlar kelganiga qaramasdan, hech kim ishchilarni shoshirish yoki tuzatilayotgan joy atrofini xo‘jako‘rsinga banner bilan to‘sib qo‘yish harakatida emas edi. Chunki mehmonlar keladi – ketadi, lekin o‘sha tuzatiladigan yo‘l shoshilmasdan sifatli ta’mirlansa, ortiqcha harajat bo‘lmaydi va uzoq yillar davomida xalqqa yaxshi xizmat qiladi. Buning natijasida budjet mablag‘lari ham samarali sarf etiladi”.
Vazir o‘rinbosari ushbu xotiralaridan quyidagicha xulosa qiladi:
“Xo‘jako‘rsinga shoshma-shosharlik qilish natijasida esa qurilish–obodonlashtirish ishlariga birinchidan ortiqcha harajat ketadi, ikkinchidan ular sifatsiz bajarilib, uzoq muddatga xizmat qilmaydi. Natijada yana qo‘shimcha harajat bo‘ladi va bu odamlarning noroziligiga olib keladi.
Budjetdagi mablag‘larimiz Shveysariya darajasidan ancha past bo‘lsa, nega ularni samarali ishlatishga harakat qilmaymiz? Shuning uchun ham barcha sohalarda ko‘zbo‘yamachilik illatidan voz kechishga haqiqiy harakat bo‘lishi shart, shundagina hayotimizga ijobiy o‘zgarishlar tezroq kirib keladi”.
Sherzod Shermatovning qayd etishicha, Shveysariya dunyoda nafaqat jon boshiga daromad bo‘yicha, balki innovatsiya reytingida ham yetakchi davlat hisoblanadi.
Izoh (0)