Haj amalini bajarishga otlangan tataristonliklar 2018-yildagi safar uchun 10-15 ming rubl miqdorida qo‘shimcha mablag‘ to‘laydi. Bu haqda Tatariston musulmonlari idorasining rasmiy haj-operatori — “TMI haj” agentligi ma’lum qildi, deya xabar beradi O‘MI matbuot xizmati.
Qayd etilishicha, Saudiya Arabistoni 2018-yildan boshlab ziyoratchilar uchun 5 foiz miqdoridagi soliq joriy etdi. Shu sababli bu davlatda ishlab chiqariladigan mahsulotlar va xizmatlar (turar joy, ovqatlanish va ziyoratchilarga xizmat ko‘rsatish) narxi qimmatladi.
Agentlik ziyoratga otlanganlarga bir qancha dasturlarni taklif qilmoqda. Hajga borish uchun talab etiladigan eng kam to‘lov 139 ming rubl (Markaziy bank o‘rnatgan kurs bo‘yicha 20 million so‘m atrofida) ekani aytilmoqda.
Bundan tashqari, 149 (21 million so‘m), 165 (23 million so‘m) va 235 ming rubllik (33 million so‘m) yo‘llanmalar borligi bildirilmoqda. “Lyuks” toifasidagi haj ziyorati uchun 375 ming rubl (53 million so‘m) to‘lanadi.
Eslatib o‘tamiz, oldinroq O‘zbekistonda 2018-yil haj ziyorati narxi 38 million so‘m etib belgilangani haqida xabar qilingandi.
Izoh (0)