Татаристонда ҳам ҳаж зиёрати нархи оширилди

Ҳаж амалини бажаришга отланган татаристонликлар 2018 йилдаги сафар учун 10-15 минг рубль миқдорида қўшимча маблағ тўлайди. Бу ҳақда Татаристон мусулмонлари идорасининг расмий ҳаж-оператори — «ТМИ ҳаж» агентлиги маълум қилди, дея хабар беради ЎМИ матбуот хизмати.

Қайд этилишича, Саудия Арабистони 2018 йилдан бошлаб зиёратчилар учун 5 фоиз миқдоридаги солиқ жорий этди. Шу сабабли бу давлатда ишлаб чиқариладиган маҳсулотлар ва хизматлар (турар жой, овқатланиш ва зиёратчиларга хизмат кўрсатиш) нархи қимматлади.

Агентлик зиёратга отланганларга бир қанча дастурларни таклиф қилмоқда. Ҳажга бориш учун талаб этиладиган энг кам тўлов 139 минг рубль (Марказий банк ўрнатган курс бўйича 20 миллион сўм атрофида) экани айтилмоқда.

Бундан ташқари, 149 (21 миллион сўм), 165 (23 миллион сўм) ва 235 минг рубллик (33 миллион сўм)  йўлланмалар борлиги билдирилмоқда. «Люкс» тоифасидаги ҳаж зиёрати учун 375 минг рубль (53 миллион сўм) тўланади.

Эслатиб ўтамиз, олдинроқ Ўзбекистонда 2018 йил ҳаж зиёрати нархи 38 миллион сўм этиб белгилангани ҳақида хабар қилинганди.