Kanadaning Bombardier kompaniyasi O‘zbekiston bozoriga kirishni rejalashtirmoqda. Bu haqda kompaniyaning shartnomalar bo‘yicha direktori Martin Xerman ma’lum qildi, deya xabar beradi Spot.
“Bombardier imtiyozli kreditlar asosida samolyotlar xarid qilishda ko‘mak berishga tayyor. Kanada eksportni rivojlantirish agentligi xarid summasining 85 foizini qoplaydigan kreditlarni 12 yil muddatga berishi mumkin”, — dedi Xerman.
Kompaniya vakiliga ko‘ra, lizing paketlari doirasidagi hamkorlik va O‘zbekistonda ayrim ehtiyot qismlarini ishlab chiqarish ham ko‘rib chiqilishi mumkin.
“Biz yaqin vaqt mobaynida O‘zbekistonda mahsulotlarimiz taqdimotini o‘tkazish va hamkorlik yo‘nalishlarini muhokama qilishni mo‘ljallaganmiz”, — ta’kidladi Martin Xerman.
Ma’lumot uchun, Bombardier yo‘lovchi samolyotlari ishlab chiqarish bo‘yicha dunyoda Boeing, Airbus va Embraer’dan so‘ng to‘rtinchi o‘rinda turadi. Yanvar oyida Bombardier Business Aircraf vakillari Toshkentga kelgandi.
Izoh (0)