Канаданинг Bombardier компанияси Ўзбекистон бозорига киришни режалаштирмоқда. Бу ҳақда компаниянинг шартномалар бўйича директори Мартин Херман маълум қилди, дея хабар беради Spot.
«Bombardier имтиёзли кредитлар асосида самолётлар харид қилишда кўмак беришга тайёр. Канада экспортни ривожлантириш агентлиги харид суммасининг 85 фоизини қоплайдиган кредитларни 12 йил муддатга бериши мумкин», — деди Херман.
Компания вакилига кўра, лизинг пакетлари доирасидаги ҳамкорлик ва Ўзбекистонда айрим эҳтиёт қисмларини ишлаб чиқариш ҳам кўриб чиқилиши мумкин.
«Биз яқин вақт мобайнида Ўзбекистонда маҳсулотларимиз тақдимотини ўтказиш ва ҳамкорлик йўналишларини муҳокама қилишни мўлжаллаганмиз», — таъкидлади Мартин Херман.
Маълумот учун, Bombardier йўловчи самолётлари ишлаб чиқариш бўйича дунёда Boeing, Airbus ва Embraer’дан сўнг тўртинчи ўринда туради. Январь ойида Bombardier Business Aircraf вакиллари Тошкентга келганди.
Изоҳ (0)