Donald Trampning ma’muriyati Pxenyanda elchixona ochish imkoniyatlarini ko‘rib chiqmoqda. Shu bilan birga, KXDRga yadro dasturidan voz kechishi uchun tovon sifatida insonparvarlik yordami yetkazib berish imkoniyati ham o‘rganib chiqilmoqda. Bu haqda Janubiy Koreya gazetalariga tayanib, “TASS” xabar berdi.
Xabar berilishicha, bu masalalar Vashington va Pxenyan vakillari tomonidan ikki tomonlama maslahatlashuvlarda muhokama qilingan. KXDR va AQSh yetakchilarining sammiti muvaffaqiyatli o‘tgan taqdirda, bu ishlar qisqa muddat ichida amalga oshirilishi mumkin.
Janubiy Koreya delegatsiyasi 5-mart kuni KXDR yetakchisi bilan Pxenyanda uchrashdi. Muzokaralar chog‘ida ikki mamlakat yetakchilarining uchrashuvini o‘tkazishga kelishib olingan. O‘shanda shimol xuddi shunday uchrashuvni AQSh prezidenti bilan ham o‘tkazishga tayyor ekanligini bildirgan. Uchrashuv joriy yilning may yoki iyun oyida bo‘lib o‘tishi mumkin.
Martdagi uchrashuvdan keyin boshlangan oliy darajadagi muloqot davomida Koreya sammitining sanasi 27-aprelga belgilangan. Ayni vaqtda unga tayyorgarlik doirasida muhokamalarning bir necha raundi bo‘lib o‘tdi. Tomonlar protokol masalalari, xavfsizlik choralari va sammitni jurnalistlar tomonidan yoritish masalalarini muhokama qilgan.
Izoh (0)